Украинада Starlink фаолияти чекланди

SpaceX ҳаракатланаётган Starlink терминаллари фаолияти тезлигини чеклаган. Чеклов соатига 100 миля, яъни тахминан 160 километрдан юқори тезликда ҳаракатланишда кучга киради.

Украина мудофаа кучлари бу чеклов ҳақида олдиндан огоҳлантирилмаган. Оқибатда бир қатор ҳарбий вазифалар бажарилмай қолган. Ушбу чора ўша пайтдаги сиёсий вазият билан боғлиқ бўлиши мумкинлигини тахмин қилди.

Украинанинг собиқ мудофаа вазири Михаил Федоров чоршанба куни кечга бориб хизмат фаолияти қисман тикланганини билдирди. У Starshield тезлигига қўйилган чекловларни тўлиқ бекор қилиш Украина мудофааси учун муҳимлигини таъкидлаб, Илон Маскка миннатдорлик билдирди ва ундан кейинги ёрдамни сўради.

Тахминан бир соат ўтиб, Маск ушбу мурожаатга жавоб берди.

«Starshield тизимлари АҚШ ҳукуматига тегишли ва унинг томонидан бошқарилади. Тезлик ёки фойдаланишга оид ҳар қандай чекловларни Америка ҳарбийлари ва якунда АҚШ президенти белгилайди», — деб ёзди у.

Маскнинг қўшимча қилишича, Starlink фуқаролик ёки мудофаа фаолияти учун мўлжалланган ва ҳужумкор ҳарбий амалиётларда ишлатилмаслиги керак. Унинг фикрича, бундай фойдаланиш тижорий компания учун номақбул бўлади.

АҚШ ҳукумати бу борада расмий изоҳ бермади. Бироқ Axios нашрига исми ошкор этилмаган юқори мартабали америкалик амалдор Вашингтоннинг Украинадаги Starlink фаолиятини чеклашга алоқаси йўқлигини айтди.

Украина Мудофаа вазирлиги вакиллари эса журналистларга SpaceX терминаллар тезлигини соатига 161 километр даражасида чеклашда давом этаётганини маълум қилди. Шу билан бирга, уларнинг қайд этишича, соатига 160 километргача бўлган тезликда алоқа сифати яхшиланган.

Starlink ва Starshield иккаласи ҳам Маскка тегишли SpaceX компаниясига қарашли. Бироқ Starlink асосан фуқаролик мақсадларида, жумладан, олис ҳудудларда интернет билан таъминлаш учун хизмат қилади. Starshield эса давлат идоралари ва ҳарбий тузилмалар эҳтиёжларига мўлжалланган.

13 октябрь куни Украина президенти Владимир Зеленский NPR нашрига берган интервьюсида Дональд Трамп маъмурияти Киев Россиянинг нефтьни қайта ишлаш заводларига зарба беришни тўхтатмаса, АҚШ Украина билан разведка маълумотларини алмашишни тўхтатиши мумкинлиги ҳақида огоҳлантирганини айтди.