ЕИ Россияга қарши янги санкциялар пакетини тайёрламоқда

Европа Иттифоқи Россияга қарши 19-санкциялар пакетини тайёрлаётганини эълон қилди. Янги пакетда Россиядан суюлтирилган табиий газ (СПГ) импорт қилишни тақиқлаш, банклар ва криптовалюта операцияларига чекловлар, шунингдек, нефть ташувчи «соя флоти»га қарши чоралар назарда тутилган.

Европа комиссияси раиси Урсула фон дер Ляйен журналистлар билан учрашувда янги чора-тадбирларнинг асосий йўналишларини тақдим этди.

Россия СПГига тақиқ

Фон дер Ляйеннинг таъкидлашича, Россиянинг ҳарбий иқтисоди асосан фоисил ёқилғидан тушадиган даромадга суянади.

«Биз бу даромадларни қисқартиришни истаймиз. Шу сабабли, Европа бозорига Россия СПГини олиб кириш тақиқланади. Вақти келди — кран ёпилади. Биз бу қарорга тайёрмиз», — деди у.

Шу билан бирга, Россия нефти учун чегара нархи 47,6 долларга туширилади. «Соя флоти»га мансуб яна 118 та кема санкция рўйхатига киритилади. Умумий ҳисобда санкциялар остидаги кема сони 560 тадан ошиб кетади.

«Роснефть» ва «Газпромнефть» каби йирик энергетика компаниялари билан савдо тўлиқ тақиқланади. Бошқа компанияларнинг активлари ҳам музлатиб қўйилади.

Банклар ва криптовалюта операцияларига чеклов

Фон дер Ляйеннинг айтишича, Россия санкцияларни айланиб ўтиш учун молиявий йўллардан фойдаланмоқда.

«Биз Россия банкларига, шунингдек, санкцияларни бузишга ёрдам берган учинчи давлат банкларига операциялар тақиқлаймиз. Шу билан бирга, криптовалюта платформалари ҳам илк бор чекловларга дуч келади», — деди у.

Янги чоралар орасида:

криптовалюта операцияларини тақиқлаш;

Россиянинг альтернатив тўлов тизимлари билан боғлиқ хорижий банкларни санкция рўйхатига киритиш;

махсус иқтисодий зоналардаги компаниялар билан битимларни чеклаш бор.

Экспорт назорати кучайтирилади

Европа комиссияси ҳарбий мақсадли товар ва технологиялар экспортига чекловларни кенгайтирмоқда.

Янги рўйхатга Россия ва учинчи давлатлардаги, Россия ҳарбий-саноат мажмуини қўллаб-қувватловчи яна 45 та компания қўшилди.

Фон дер Ляйеннинг таъкидлашича, жорий санкциялар аллақачон Россия иқтисодиётига катта зарба берган.

Украинага молиявий ёрдам

Европа Иттифоқи Украина мудофаа соҳасини молиялаштириш учун янги механизм ишлаб чиқмоқда.

«Биз музлатилган Россия активларидан олинган даромадларни Украина ҳимояси учун йўналтириш имконини берувчи қарор устида ишлаяпмиз», — деди фон дер Ляйен.

Санкциялар қачон кучга киради?

Янги пакет фақат 27 та ЕИ давлати бир овоздан маъқуллагандан кейин амалга киритилади.

Шу пайтгача ЕИ 18 та санкциялар пакетини қабул қилган бўлиб, улар савдо, молия, энергетика, саноат, технология, транспорт, икки хил мақсадли товарлар, олтин, ёқут ва қимматбаҳо буюмларни қамраб олган.

Европа Иттифоқи санкциялари рўйхатида ҳозирда 2,5 мингдан ортиқ жисмоний ва юридик шахс бор.