Канада ҳамда Испаниянинг Ўзбекистондаги янги элчилари тайинланди
Кеча, 18 февраль куни Канада ҳамда Испаниянинг Ўзбекистонга янги тайинланган элчилари мамлакат Ташқи ишлар вазири Бахтиёр Саидов билан кўришиб, унга ишонч ёрлиқларини топширди. Бу ҳақда Ташқи ишлар вазирлиги матбуот хизмати маълум қилди.
Kanada hamda Ispaniyaning Oʻzbekistondagi yangi elchilari tayinlandi
Қайд этилишича, кечадан бошлаб Кристофер Дугган Канаданинг Ўзбекистондаги элчиси, Рикардо Мартинес Васкес эса Испаниянинг Ўзбекистондаги элчиси вазифасига киришган.
Ташқи ишлар вазири Бахтиёр Саидов ўзининг Telegram-саҳифасида элчилар билан учрашганини ёзар экан, Ўзбекистон ва Марказий Осиё давлатлари фаол ташқи сиёсат олиб бораётганини ҳамда минтақанинг глобал роли кенгайиб бораётганини айтиб ўтган.
"Биз Ўзбекистон ҳамда Канада алоқаларида ҳали рўёбга чиқмаган катта салоҳиятни кўрмоқдамиз. Жаноб элчига фаолияти давомида мамлакатларимиз ўртасида мавжуд кўприкларни мустаҳкамлаш ва янгиларини барпо этишда муваффақиятлар тилаймиз", дея ёзган вазир.
Шунингдек, у элчи Рикардо Мартинес Васкес билан кўришганини баён қилган постда Ўзбекистон ҳамда Испания ўртасидаги икки томонлама муносабатлар динамикаси юқорига қараб кетаётганлигини маълум қилган.
"Икки мамлакат ташқи ишлар вазирликлари биргаликда ҳаётга татбиқ этиши лозим бўлган улкан имкониятларни алоҳида эътироф этдик. Жаноб элчига Ўзбекистон ҳамда Испания ҳамкорлигининг янги йўналишларини ривожлантиришда ва самарали фаолият олиб боришида омад тилаймиз", дея қайд этган у.
