Трамп Онтарио кўли номини “Америка кўли” деб ўзгартирди

АҚШ президенти Дональд Трамп 27 август куни Онтарио кўли номини “Америка кўли” (Lake America) деб ўзгартирди. Бу ҳақда Reuters ёзди.

Шимолий Американинг бешта Буюк кўлларидан бири – Онтарио кўлига оид фармон фақат АҚШ федерал идоралари томонидан қўлланилади. Канада, халқаро органлар ёки бошқа ташкилотларнинг кўлни қандай аташини белгиламайди.

Трамп баёнотидан бир неча соат ўтиб, Канада бош вазири ва Нью-Йорк штатининг демократик губернатори 400 йилдан ошиқроқ тарихга эга номни ўзгартирмасликларини маълум қилди. Нью-Йорк АҚШ тарафидан кўл билан чегарадош.

“Биз Онтарио кўли номини дарҳол Америка кўли деб ўзгартирамиз. Кўл номининг ўзгариши, яъни Америка кўли, аслида, мен узоқ вақтдан бери ўйлаб юрган нарса эди”, – деди Трамп журналистларга.

Бу ҳаракат Канада билан зиддиятни янада кучайтирди. Ўтган ҳафта АҚШ ва Канада ўртасидаги савдо музокаралари барбод бўлиб, бунда ҳар икки томон бир-бирини айблади.

“Америка ўзгармоқда”

Канада Бош вазири Марк Карнининг таъкидлашича, кўлнинг номи Канада ва АҚШ давлат сифатида ташкил топишидан анча аввал пайдо бўлган.

“Биз Американинг ўзгараётганини биламиз. Бу савдо муносабатлари, ташқи сиёсати, миллий ёдгорликлари, гидронимларида намоён бўлмоқда. Шунингдек, канадаликлар ҳақиқатни – аввал ҳам, ҳозир ҳам ва ҳар доим уни Онтарио кўли деб аташни билишади”, — деди Карни ижтимоий тармоқларда.

Онтарио кўли юзасининг қарийб 52 фоизи Канадага, қолган қисми эса Нью-Йорк штатига қарашли.

Нью-Йорк губернатори Кети Хокул ижтимоий тармоқда муносабат билдириб, Нью-Йорк уни янги ном билан атамаслигини айтди.

Канада ва Нью-Йорк штати билан чегарадош Вермонт штатининг республикачи губернатори Фил Скотт Трампнинг қарорини “арзимас ва умидсиз” деб баҳолади.

“Бизга энди океан керак”

Пайшанба куни Трамп океанлар номини ўзгартиришни ҳам таклиф қилди.

“Бизда кўрфаз ҳам, кўл ҳам бор, энди бизга фақат океан керак. Шундай экан, балки Атлантика ёки Тинч океани номини алмаштиришимизга тўғри келар. Балки иккаласини ҳам ўзгартирармиз”, – деди Трамп журналистларга.

2025 йил бошидан буён Трамп Канадани АҚШнинг 51 штатига айланиши борасида бир неча бор айтган, бироқ Канада раҳбарлари бу фикрни бемаънилик деб атаган.

Трамп лавозимига қайтганидан буён ўз номини ҳам Вашингтондаги машҳур иморатлар, ҳарбий-денгиз кучларининг янги туркумдаги кемалари, бадавлат хорижликлар учун мўлжалланган виза дастури, ҳукуматга қарашли дори-дармонлар веб-сайти ҳамда болалар учун очиладиган федерал жамғарма ҳисобварақларига беришга ҳаракат қилиб кўрди.

Бундан ташқари, 2025 йил январь ойида Мексика кўрфази номини Америка кўрфазига ўзгартиришни буюрди.