Kanada hamda Ispaniyaning Oʻzbekistondagi yangi elchilari tayinlandi
Kecha, 18 fevral kuni Kanada hamda Ispaniyaning Oʻzbekistonga yangi tayinlangan elchilari mamlakat Tashqi ishlar vaziri Baxtiyor Saidov bilan koʻrishib, unga ishonch yorliqlarini topshirdi. Bu haqda Tashqi ishlar vazirligi matbuot xizmati maʼlum qildi.
Kanada hamda Ispaniyaning Oʻzbekistondagi yangi elchilari tayinlandi
Qayd etilishicha, kechadan boshlab Kristofer Duggan Kanadaning Oʻzbekistondagi elchisi, Rikardo Martines Vaskes esa Ispaniyaning Oʻzbekistondagi elchisi vazifasiga kirishgan.
Tashqi ishlar vaziri Baxtiyor Saidov oʻzining Telegram-sahifasida elchilar bilan uchrashganini yozar ekan, Oʻzbekiston va Markaziy Osiyo davlatlari faol tashqi siyosat olib borayotganini hamda mintaqaning global roli kengayib borayotganini aytib oʻtgan.
"Biz Oʻzbekiston hamda Kanada aloqalarida hali roʻyobga chiqmagan katta salohiyatni koʻrmoqdamiz. Janob elchiga faoliyati davomida mamlakatlarimiz oʻrtasida mavjud koʻpriklarni mustahkamlash va yangilarini barpo etishda muvaffaqiyatlar tilaymiz", deya yozgan vazir.
Shuningdek, u elchi Rikardo Martines Vaskes bilan koʻrishganini bayon qilgan postda Oʻzbekiston hamda Ispaniya oʻrtasidagi ikki tomonlama munosabatlar dinamikasi yuqoriga qarab ketayotganligini maʼlum qilgan.
"Ikki mamlakat tashqi ishlar vazirliklari birgalikda hayotga tatbiq etishi lozim boʻlgan ulkan imkoniyatlarni alohida eʼtirof etdik. Janob elchiga Oʻzbekiston hamda Ispaniya hamkorligining yangi yoʻnalishlarini rivojlantirishda va samarali faoliyat olib borishida omad tilaymiz", deya qayd etgan u.
