«Эркин бўлиш», «Эркин гапириш»: Тошкентда журналист аёллар подиумга чиқди

Тадбир Ўзбекистон замонавий журналистикани ривожлантириш маркази ташаббуси билан ташкил этилди.

Кечада журналистлар, фаоллар ва турли соҳалар экспертлари иштирок этди. Подиумга профессионал моделлар эмас, балки ҳар куни жамиятдаги муҳим мавзулар ҳақида ёзадиган, савол берадиган ва жамоатчилик фикрини шакллантиришда иштирок этадиган аёллар чиқди.

Миллийлик ва замонавийлик уйғунлиги

Кечанинг биринчи қисмида Human Wear бренди ва дизайнер Лола Сайфи коллекцияси намойиш этилди. Қўл меҳнати билан ишланган миллий нақшлар ва табиий матолар тадбирга ўзига хос муҳит бағишлади.

Шундан сўнг дизайнер Дина Сайфининг замонавий услубдаги коллекцияси тақдим қилинди. Унда миллий матолар янги шакл ва услубларда намоён бўлиб, иштирокчи аёлларнинг фаол ва эркин образлари билан уйғунлашди.

Тадбир аввалида Ipak Yuli Bank маркетинг ва PR директори Нана Мардоян сўзга чиқиб, She’s Next ташаббуси ҳақида тўхталди.

У аёлларни қўллаб-қувватлаш, уларнинг тадбиркорлик ва профессионал фаолиятида имкониятларини кенгайтириш муҳимлигини таъкидлади.

Кеча давомида “Ўзинг бўлиш эркинлиги. Фикр билдириш эркинлиги” номинациялари ҳам топширилди. Илк бор таъсис этилган мазкур мукофотлар жамоатчиликка муҳим мавзуларни етказиб келаётган фаол аёлларга бағишланди.

Номинация соҳиблари қаторида Дана Опарина, Фируза Нажмиддинова ва Нигина Худайбергенова бор.

Шунингдек, Azim Taffakur ННТ ва Ilm Nuri ННТ ҳам жамоатчилик билан самарали ишлаётгани учун алоҳида тақдирланди.

Тадбир иштирокчиларига Artel компанияси томонидан эсдалик совғалари топширилди.

Намойиш-перформанс Visaнинг глобал She’s Next ташаббуси, TBC Bank Uzbekistan, Ipak Yuli Bank, Artel ҳамда MSA Resort кўмагида ташкил этилди.