Москвада миллатчиликка қарши курашиш жамияти тузилди

Москва шаҳрида фаол аёллар гуруҳи томонидан Қобилжоннинг онасини қўллаб-қувватлаш ҳамда миллатчиликка қарши курашишга қаратилган жамоат ташаббуси ташкил этилди. Жамият аъзоларининг таъкидлашича, ушбу ҳаракатнинг асосий мақсади — жиноятни миллат билан боғлаш амалиётига барҳам бериш, нафрат ва камситилишга қарши туриш ва болалар ҳамда оилалар хавфсизлигини ҳимоя қилишдир.

Сўнгги йилларда турли миллат вакиллари иштирокида содир бўлган оғир жиноятлар ижтимоий тармоқлар ва оммавий муҳокамаларда бутун бир халқ ёки миллатни айблаш учун сабаб сифатида ишлатилмоқда. Бу эса жамиятда нафрат, қўрқув ва ўзаро ишончсизликни кучайтиради.

Жамият вакиллари қуйидаги муҳим нуқталарни алоҳида таъкидлашди:

• Жиноятнинг миллати бўлмайди. Айб шахснинг ўзига тегишли бўлиб, унинг келиб чиқиши ёки миллати билан боғлаш асоссиз ва хавфли.
• Болалар нафрат ғояларининг қурбони бўлмаслиги керак. Катталарнинг миллатчилик руҳидаги гап-сўзлари болалар онгида чуқур из қолдириши мумкин.
• Миллатлар аро адоватни қўзғатиш — жамият хавфсизлигига таҳдид. Бундай ҳаракатлар ҳақиқий жиноятчилардан кам хавфли эмас.

Жамият фаолияти доирасида ҳуқуқий маслаҳатлар, психологик қўллаб-қувватлаш, очиқ мулоқотлар ҳамда ахборот-маърифий материаллар тайёрлаш режалаштирилган. Шунингдек, сайт орқали ишончли ахборот тарқатиш ва турли миллат вакиллари ўртасида ўзаро ҳурматни мустаҳкамлаш кўзда тутилган.

Ташаббускорлар барчани жавобгарликка, вазминликка ва инсонпарварликка чақириб, жиноятни миллат билан эмас, қонун ва адолат билан баҳолаш зарурлигини таъкидлашмоқда.