Навбатдаги авиаҳалокат: Канадада йўловчи самалёти ағдарилиб кетди

Маълумотларга кўра, ҳодиса оқибатида саккиз киши жароҳатланган. Улардан уч нафари — бир бола ва икки катта ёшдаги фуқаролар оғир аҳволда шифохонага ётқизилган. Самолёт — Bombardier CRJ 900 бортида жами 76 нафар йўловчи ва тўртта экипаж аъзоси бўлган. 

Аэропорт маъмуриятининг маълум қилишича, ҳодиса оқибатида ҳалок бўлганлар йўқ. Delta Airlines вакилларининг аниқлик киритишича, ушбу рейсни Endeavor Air авиакомпанияси амалга оширган. Ушбу компания Delta Аирлинес'нинг Миннеаполис шаҳрида жойлашган шўба корхонаси ҳисобланади. 

Ҳодиса жойидан олинган фото ва видеоларда самолётдан кўтарилган тутунни кўриш мумкин, аммо катта ёнғин содир бўлгани ҳақида хабар берилмаган. 

"Reuters" агентлигига маҳаллий полиция вакили Сара Паттен берган маълумотга кўра, самолёт ичида бўлган йўловчилар ўз кучлари билан ундан чиқишга муваффақ бўлишган.

"Бу авиация ҳалокати. Бироқ, ҳозирча унинг аниқ сабабларини билмаймиз. Менинг тушунишимча, аксарият йўловчилар самолётдан чиқишга муваффақ бўлишди ва жиддий жароҳатланишмади. Аммо биз ҳали ҳам бу маълумотни тасдиқлаш устида ишлаяпмиз, шу сабабли ҳодиса жойида текширув давом этмоқда", деди у.

ОАВнинг таъкидлашича, Торонто шаҳрида сўнгги кунларда кучли қор ёғингарчиликлари кузатилган. Cўнгги бир ҳафта ичида маҳаллий аэропорт ҳудудида 53,6 см қор ёққан. Бу эса охирги уч ой давомида тушган қор миқдоридан ҳам кўпроқ.

Маълумот учун, Bombardier — Канаданинг машинасозлик ва авиация соҳасидаги компанияси бўлиб, асосан кичик самолётлар ва бизнес-жетлар ишлаб чиқаришга ихтисослашган. Ушбу самолётлар Шимолий Америкада жуда машҳур бўлиб, баъзи Европа авиакомпаниялари ҳам улардан фойдаланади.

Эслатиб ўтамиз, январь ойи охирида Вашингтон яқинидаги аэропортда Bombardier CRJ700 самолёти билан фалокатли ҳодиса юз берган эди. Қўниш вақтида самолёт ҳавода Black Hawk ҳарбий вертолёти билан тўқнашган ва иккала ҳаво кемаси Потомак дарёсига қулаган. Ушбу ҳалокат оқибатида барча йўловчилар ва экипаж аъзолари ҳалок бўлган, жумладан, самолёт ичида Россиянинг бир неча собиқ фигурачилари ҳам бўлган.