Оилавий тадбиркорлик учун имтиёзли кредит миқдори оширилади

Айни пайтда импорт қилинган ва сертификатга эга наслий чорва хариди учун 100 миллион сўмгача кредит ажратилиши белгиланмоқда.

Шунингдек, уй меҳмонхонаси, кичик ҳажмли музлаткичлар, маҳсулотни сақлаш ва қайта ишлашга мўлжалланган мини технологиялар учун 150 миллион сўмгача гаровсиз кредит ажратилади.

Чегара ва анклав ҳудудларда жойлашган 562 та маҳаллада амалга оширилаётган тадбиркорлик лойиҳалари учун кредит миқдори 1 миллиард сўмгача оширилади. Бу мақсадда режалаштирилган 3,6 триллион сўм маблағга қўшимча равишда яна 2 триллион сўм ресурс йўналтирилади.

Маҳаллалар ихтисослашувини чуқурлаштириш доирасида жорий йилда банклар томонидан жами 17 триллион сўмлик кредит ажратилиши кўзда тутилган. Ушбу жараёнда маҳсулот етиштириш учун олинган кредитларнинг 4 фоизи, маҳсулотни қайта ишлаш лойиҳалари бўйича эса 6 фоизи қоплаб берилади.