Oilaviy tadbirkorlik uchun imtiyozli kredit miqdori oshiriladi

Ayni paytda import qilingan va sertifikatga ega nasliy chorva xaridi uchun 100 million soʻmgacha kredit ajratilishi belgilanmoqda.

Shuningdek, uy mehmonxonasi, kichik hajmli muzlatkichlar, mahsulotni saqlash va qayta ishlashga moʻljallangan mini texnologiyalar uchun 150 million soʻmgacha garovsiz kredit ajratiladi.

Chegara va anklav hududlarda joylashgan 562 ta mahallada amalga oshirilayotgan tadbirkorlik loyihalari uchun kredit miqdori 1 milliard soʻmgacha oshiriladi. Bu maqsadda rejalashtirilgan 3,6 trillion soʻm mablagʻga qoʻshimcha ravishda yana 2 trillion soʻm resurs yoʻnaltiriladi.

Mahallalar ixtisoslashuvini chuqurlashtirish doirasida joriy yilda banklar tomonidan jami 17 trillion soʻmlik kredit ajratilishi koʻzda tutilgan. Ushbu jarayonda mahsulot yetishtirish uchun olingan kreditlarning 4 foizi, mahsulotni qayta ishlash loyihalari boʻyicha esa 6 foizi qoplab beriladi.