Энди ўзбекистонликлар Италия қишлоқ хўжалигида ишлаши мумкин

Италиянинг “Confagricoltura” қишлоқ хўжалиги конфедерацияси витсе-президенти Лука Бронделли ди Бронделло бугун бошланган биринчи Тошкент халқаро миграция форуми доирасида айтишича, Италия қишлоқ хўжалиги конфедерацияси Ўзбекистон билан хусусан, Қишлоқ хўжалиги вазирлиги ва Миграция агентлиги билан яқин муносабатлар ўрнатган.

Ҳамкорликда амалга ошираётган ўқув-курси дастурини якунлаган иштирокчилар Италиядаги фермер хўжаликларида ишлаш имконига эга бўлади.

Ўқув-курсидан мақсад – Ўзбекистон фуқароларига Италиядаги ҳаёт билан танишиш, қишлоқ хўжалигидаги замонавий усулларни ўрганиш ва тажриба олиш имконини яратиш.

Италияда озиқ-овқат ва виночилик соҳаси жадал ривожланмоқда. Сўнгги ўн йилда экспорт икки баробардан кўпроқ ўсиб, йилига 73 миллиард еврога етди.

“Шу сабабли, бизга малакали мутахассислар зарур. Ўзбекистонда ўқишга, янги технологияларни ўзлаштиришга ва тажриба олишга интилаётган кўплаб ёшлар бор, деб ишонаман. Шу боис, ушбу ҳамкорлик ҳам Ўзбекистон, ҳам Италия учун муҳим ва фойдали қадам бўлади” – деди вакил.

Унинг сўзларига кўра, Тошкентда қишлоқ хўжалиги соҳасида кадрлар тайёрлаш бўйича кучли ва замонавий марказ фаолият юритмоқда. Ҳамкорлар – “Умана”, Ўзбекистон Қишлоқ хўжалиги вазирлиги ҳамда Миграция агентлиги билан биргаликда амалга ошираётган ишлар яхши натижалар бермоқда. Биринчи мутахассислар гуруҳи эса яқин вақтда Италияга етиб бориши кутилмоқда.

Дастур иштирокчилари итальян тилини ўрганмоқда, чунки уларга мулоқот қилиш ва Италиядаги ҳаётни тушуниш керак бўлади.  Шунингдек, улар касбий тайёргарликдан ўтмоқда.

Дастлаб тракторларни бошқарадиган мутахассислар гуруҳидан бошлашга қарор қилинган. Бироқ замонавий тракторлар оддий техника эмас — бугунги кунда улар сунъий йўлдош тизимлари ва рақамли ечимлар билан ишлайдиган юқори технологик машиналардир.

Замонавий қишлоқ хўжалиги тобора рақамлашмоқда ва бўлажак мутахассислар Ўзбекистондаёқ керакли билимларни олишмоқда. Улар Италияга келиб фермер хўжаликларимизда ишлаганидан сўнг яна-да юқори малакага эга бўлади, дея таъкидлади Лука Бронделли ди Бронделло .