Ўзбекистонда айрим талабаларнинг ётоқхона ёки бир йиллик ижара харажатлари ваучер орқали қопланади

Ўзбекистонда Ижтимоий реестрга киритилган оилалар фарзандларига бир қатор таълим ва ижтимоий хизматлар учун ваучер ажратилади. У орқали боғча пули, ўқув маркази тўлови, йўл кира, шунингдек, олийгоҳда таҳсил олаётган фарзандларнинг ётоқхона ва ижара уй харажатлари қопланади.

Бу тартиб 2027-йил 1-январдан бошлаб жорий этилади. Тегишли нормалар Президентнинг 11-сентабрда имзоланган ПФ-193-сон фармонида белгиланган.

Ваучерлар маҳалла еттилиги томонидан тасдиқланадиган индивидуал режа асосида ёки боланинг қонуний вакили мурожаатига кўра шакллантирилади.

Боғча пули ва қўшимча таълим харажатлари

Ваучер асосида давлат ва нодавлат мактабгача таълим ташкилотларида бола таъминоти учун белгиланган тўловларни қоплаш имконияти яратилади. Ваучернинг амал қилиш муддати 12 ой этиб белгиланган.

Бунда оила Ижтимоий реестрдан чиқарилган тақдирда ҳам ваучернинг амал қилиш муддати тугагунига қадар ундан фойдаланиш ҳуқуқи сақланиб қолади.

Ваучер орқали мактабгача таълим ташкилотига у жойлашган ҳудудда бола таъминоти учун белгиланган тўлов миқдорида маблағ ажратилади. Ушбу харажатлар давлат бюджети маблағлари ҳисобидан мактабгача таълим хизматини кўрсатган ташкилотга қоплаб берилади.

Шунингдек, Ижтимоий реестрга киритилган оилаларнинг умумий ўрта таълим муассасаларида ўқиётган фарзандларини қўшимча таълимга жалб қилиш ва уларнинг бориб-келиш йўл кира харажатларини қоплаш механизми ҳам жорий этилади. Бу йўналиш учун Мактабгача ва мактаб таълими вазирлиги масъул этиб белгиланган.

Талабалар учун

Янги тартиб Ижтимоий реестрга киритилган оилаларнинг кундузги таълим шаклида таҳсил олаётган талаба фарзандларига ҳам тааллуқли.

Уларга давлат ОТМларидаги талабалар турар жойларидан фойдаланиш, давлат-хусусий шериклик асосида ташкил этилган талабалар турар жойларида яшаш ҳамда хусусий уй-жойларни ижарага олиб яшаш харажатлари қоплаб берилади.

Бу ҳолатда ҳам ваучер 12 ой давомида амал қилади. Оила Ижтимоий реестрдан чиқарилган тақдирда, ваучер амал қиладиган муддат давомида ундан фойдаланиш ҳуқуқи сақланади.

Талабалар турар жойларида яшаш харажатлари талаба номига очилган ижтимоий картага давлат бюджети маблағлари ҳисобидан қоплаб берилади. Ушбу йўналиш учун Олий таълим, фан ва инновациялар вазирлиги масъул ҳисобланади.