Янги Тошкентда ҳокимлик очилади: шаҳарда қайси идоралар иш бошлайди?

Президентнинг 2026 йил 10 ноябрдаги ПФ–243-сон Фармони билан Янги Тошкент шаҳрида бошқарув тизими белгиланди. Ҳужжатга кўра, шаҳарда алоҳида ҳокимлик ташкил этилади, унинг раҳбарини Президент тайинлайди. Шунингдек, 16 та давлат органи ва ташкилотнинг ҳудудий бўлинмалари фаолияти йўлга қўйилади.

Фармон 2026 йил 11 ноябрдан кучга кирган. 

Ҳокимни Президент тайинлайди

Янги Тошкент шаҳри ҳокимини Ўзбекистон Президенти лавозимга тайинлайди ва лавозимидан озод этади. Ҳоким тегишли маъмурий-ҳудудий бирлик ташкил этилгунига қадар фаолият юритади.

Ҳокимликнинг бошқарув аппарати 14 нафар ходимдан иборат бўлади. Унинг таркибига ҳоким, биринчи ўринбосар ва икки нафар ўринбосар, ёрдамчи, ахборот хизмати раҳбари (давлат тили бўйича маслаҳатчи), ташкилий-назорат гуруҳи, бош ҳисобчи, бош юрисконсулт ҳамда девонхона киради.

Ҳоким ўринбосарларининг масъулият йўналишларини Янги Тошкентни ривожлантириш режаларидан келиб чиқиб, ҳокимнинг ўзи белгилайди.

16 та давлат органи бўлинмаси ташкил этилади

Янги шаҳарда 16 та давлат органи ва ташкилотнинг ҳудудий бўлинмалари иш бошлайди. Улар учун жами 30 та штат бирлиги ажратилади.

Бўлинмалар қуйидаги йўналишларни қамраб олади: экология, статистика, иқтисодиёт ва молия, инвестициялар, таълим, қурилиш ва уй-жой коммунал хўжалиги, маданият, кадастр, ёшлар ишлари, оила ва хотин-қизлар, санитария-эпидемиология.

Бундан ташқари, шаҳарда Президентнинг Халқ қабулхонаси, тиббиёт бирлашмаси, солиқ инспексияси ҳамда маҳалла фуқаролар йиғини фаолияти йўлга қўйилади.

Ҳуқуқни муҳофаза қилувчи органлар ҳам тузилма очади

Бош прокуратура, Ички ишлар вазирлиги, Адлия вазирлиги ва Фавқулодда вазиятлар вазирлиги бир ой муддатда Янги Тошкент шаҳрида ўз тузилмаларини ташкил этиши керак.

Ушбу тузилмалар тегишли идораларнинг амалдаги штат бирликлари ҳисобидан шакллантирилади.

Ҳокимликнинг ваколатлари ва харажатлари

Фармонга кўра, ҳокимлик Янги Тошкент шаҳрини барпо этиш дирексиясига берилган ҳудудларда Тошкент вилояти ва туманлари давлат органлари ваколатига кирадиган масалалар бўйича мустақил қарор қабул қилади.

Ҳокимлик ва унинг таркибидаги бўлинмаларни сақлаш харажатлари республика буджети ҳисобидан молиялаштирилади.

Фармонда алоҳида кўрсатилмаган бошқа давлат органлари эса шаҳарда Тошкент вилоятидаги мавжуд бўлинмалари орқали фаолият юритишда давом этади.

Ҳокимлик вақтинча қаерда жойлашади?

Ҳокимлик ва давлат органларининг янги ташкил этиладиган бўлинмалари вақтинча собиқ «Янги Тошкент» лойиҳа офиси биносига жойлаштирилади. Улар ушбу бинодан бепул фойдаланади.