Давлат органлари формасига ўхшаш кийим кийганлик учун жавобгарлик белгиланмоқда

Сўнгги вақтларда айрим ташкилотлар, идоралар, ҳатто айрим фуқаролар томонидан белгиланган тартибда тасдиқланган формали кийим-бошга адаштириб юбориш даражасида ўхшаш кийим-бошларни кийиб юриш ёки айрим ташкилотлар томонидан ўз ходимлари учун шундай кийим-бошларни жорий этиш ҳолатлари кузатилмоқда.

Бу эса фуқароларни чалғитиши, давлат органлари обрўйига салбий таъсир кўрсатиши, айниқса, айрим шахсларга ўзини давлат органи ходими сифатида кўрсатиб, одамлар ишончини суиистеъмол қилиш имкониятини яратиши мумкин.

Эндиликда давлат органларининг тасдиқланган ҳарбий ёки идоравий формали кийим-бошига адаштириб юбориш даражасида ўхшаш ҳамда унга хос фарқловчи белгилар ва рамзларга эга формали кийим-бошни кийиб юрганлик ёки жорий этганлик учун маъмурий жавобгарлик белгиланмоқда.

Шу мақсадда ишлаб чиқилган давлат тузилмалари ходимларининг формали кийим-бошини қонунга хилоф равишда кийиб юриш ҳолатларининг олдини олишга қаратилган қонун лойиҳаси парламент қуйи палатаси мажлисида иккинчи ўқишда муҳокама қилинди.

Қонун лойиҳасининг қабул қилиниши натижасида формали кийим-бошлар билан боғлиқ қоидалар янада тартибга солинади, уларни қонунга хилоф равишда кийиб юриш ёки жорий этиш ҳолларининг олдини олади, мазкур қилмишларни содир этганлик учун жавобгарлик муқаррарлиги таъминланади.

Қонун лойиҳаси иккинчи ўқишда қабул қилинди.