Бекатлар ўз вазифасини бажаряптими?

Бу эса шаҳар инфратузилмасини лойиҳалаш ва қабул қилиш сифати ҳақида қатор саволларни туғдирмоқда.

Замонавий автобус бекатлари нафақат эстетик кўринишга, балки амалий вазифасига ҳам жавоб бериши керак. Жумладан, улар ёзда қуёш, қишда шамол ва ёмғирдан ҳимоя қилиши, ногиронлиги бўлган шахслар учун ҳам қулай бўлиши лозим.

Шу нуқтаи назардан қуйидаги саволлар долзарб:

• Бекат лойиҳасини қайси ташкилот ишлаб чиққан?
• Лойиҳани тайёрлашда иқлим шароити ҳисобга олинганми?
• Экспертиза ва қабул комиссияси объектни фақат ҳужжатлар асосида қабул қилганми ёки амалда ҳам синовдан ўтказганми?
• Давлат маблағи ҳисобидан қурилган объект ўз вазифасини тўлиқ бажармаса, уни қабул қилиш қай даражада тўғри?

Жаҳон амалиётида автобус бекатлари шаҳар инфратузилмасининг муҳим қисми ҳисобланади. Масалан, Сингапур, Жанубий Корея, Япония ва Европа давлатларида бекатлар кенг соя ҳосил қилувчи томлар, ён томондан шамол ва ёмғирдан ҳимоя қилувчи панеллар, айрим ҳудудларда эса иситиш ёки совутиш тизимлари билан жиҳозланади. Шунинг учун ҳам бекатнинг асосий вазифаси йўловчини об-ҳаво таъсиридан ҳимоя қилишдир.

Агар одамлар бекат ичида эмас, унинг орқасида туришни афзал кўраётган бўлса, бу объектнинг функционаллиги бўйича жиддий саволлар туғилиши табиий.

Айниқса, бугунги кунда Ўзбекистонда ҳаво ҳарорати 45 даражага яқинлашаётган бир пайтда бекатлар йўловчилар учун қулай ва хавфсиз муҳит яратиши талаб этилади.

Бундан ташқари, бугун иссиқдан паноҳ бера олмаётган айрим бекатлар қишнинг қаҳратон совуқлари ва кучли шамолидан ҳам етарлича ҳимоя қилиши қийин. Демак, масала фақат ёз фасли билан чекланмайди.

Давлат маблағи эвазига қурилган ҳар қандай иншоот, аввало, инсон манфаатига хизмат қилиши лозим. Бекат ҳақидаги ҳисоботда "объект қурилди" деб ёзишнинг ўзи етарли эмас. Муҳими, унинг амалда қандай ишлаётганидир.