Ўзбекистонга олиб келинган фаластинликлар учун махсус жамғарма ташкил этилади

Мамлакат президенти бу борадаги мамлакат позициясини турли хил халқаро ва маҳаллий даражадаги йиғилишларда гапирмоқда.

2023 йил 3 ноябрь куни президент Ш.Мирзиёев томонларни зудлик билан ҳарбий ҳаракатларни тўхтатишга, ўт очишни тўхтатишга ва гуманитар мақсадларда сулҳга ўтишга чақирди.

Унга кўра, Яқин Шарқдаги бу муаммонинг ягона ва энг адолатли ечими "икки халқ учун икки давлат" тамойили асосида қабул қилиниши керак. БМТ резолюцияларида белгиланганидек, Фаластин халқи мустақил давлат тузиш ҳуқуқига эга.

2023 йил ноябрь ойида Ш.Мирзиёев БМТнинг Яқин Шарқ агентлигига (UNRWA) Ғазо секторидаги фаластинлик қочқинларга ёрдам бериш учун 1,5 миллион доллар ажратиш тўғрисидаги қарорни имзолаган эди.

2024 йил 26 декабрь куни 100 нафар яраланган фаластинлик аёллар ва болалар кузатувчилари билан бирга Рафаҳдан Ўзбекистонга эвакуация қилинган эди.

Улар вақтинча яшаш жойларига жойлаштирилди, тиббий кўрикдан ўтказилиб, керакли дори-дармонлар ва кундалик эҳтиёжлар билан тўлиқ таъминланди.

Фаластиндан Ўзбекистонга олиб келинган фуқароларнинг муносиб ҳаёт кечириши учун барча зарур шароитлар яратилди.

Жорий йилнинг 14 август куни бу йўналишда алоҳида чора-тадбирлардан иборат президент фармони қабул қилинди. Унинг мақсади – Ўзбекистондаги фаластинлик фуқароларга давлат ғамхўрлиги, меҳр-шафқат тамойиллари асосида кўмак бериш тизимини йўлга қўйишдан иборат.

Президент фармони кўра:

- Ўзбекистонга олиб келинган фаластинлик фуқароларга зарур иш стажига эга бўлмаган кекса фуқароларга бериладиган нафақа тайинланади;

- ҳар бир меҳнат ёшидаги меҳмон (И ва II гуруҳ ногиронлиги бўлган шахслар бундан мустасно) учун ҳар ойда минимал истеъмол харажатлари миқдорида яшаш нафақаси жорий этилади;

- меҳмонларнинг ҳар бир оиласига яшаш манзили бўйича уй-жойнинг ижара харажатлари қоплаб берилади;

- меҳмонларга фарзанд туғилганда бериладиган бир марталик нафақа ҳамда дафн этиш учун нафақа тўлови Ўзбекистон фуқаролари учун белгиланган миқдорда тўланади;

- меҳмонларнинг ҳар бир оиласига бирламчи зарурий воситалар хариди учун бир марталик кўтарма пул қўшимча тўлаб берилади;

- меҳмонларнинг оила аъзоларига шахсий ҳамроҳлик қилиш ва индивидуал кўмак кўрсатиш учун биттадан маҳалладаги ижтимоий ходим бириктирилади.