Париж-2024: Финалда тўқнашадиган футбол жамоалари маълум бўлди

Биринчи ўйинда Африка қитъаси чемпионлари ўйинни устунлик билан бошлади ва улар томонидан ўйиннинг 37-дақиқасида рақиб дарвозасига гол киргизилди. Гол ўтказиб юборган испанлар эса, ўйиннинг 65 ҳамда 85-дақиқаларида жавоб голларини қайтарди.

Иккинчи ярим финал баҳси мезбон Франция ва Африканинг бошқа бир жамоаси — Миср олимпиячилари ўртасида бўлиб ўтди. Ўйин мезбонларнинг яққол устунлиги билан бошланди. Биринчи таймда жамоалар муросали ўйин кўрсатган бўлса, иккинчи таймда Миср вакиллари биринчи бўлиб ҳисобни очди. Бу сафар жамоа етакчиси Маҳмуд Сабир катта саҳнага чиқди. Орадан бироз вақт ўтгач, Франция вакили Жан-Филипп Матета ҳисобни тенглаштирди.

Ўйиннинг асосий вақти 1:1 ҳисобида якунланди. Экстра таймларда жисмоний тайёргарлик устунлик қилди. Дастлаб Франция шарафини ҳимоя қилаётган  футболчи Матетанинг ўзи рақиб дарвозасига иккинчи голни киритган бўлса, Майкл Олисе орадаги фарқни иккитага оширди ва французларга финал йўлланмасини туҳфа қилди. 

Натижалардан маълумки, финалда Франция ва Испания иштирокидаги ўйин кузатилади. Бронза медаллари учун баҳсда Африканинг икки Олимпия терма жамоаси — Миср ва Марокаш иштирокидаги ўйиннинг гувоҳи бўлиш мумкин. Учинчи ўрин учун баҳс 8 август Тошкент вақти билан соат 20:00 да старт олади. Финал учрашуви 9 август соат 21:00 да бошланади.