Путин Россия ядровий сув ости кемалар флотини кенгайтиришни талаб қилди

"Ҳарбий-денгиз флотининг сув ости кучлари Россия суверенитети ва хавфсизлигини таъминлашда, унинг манфаатларини ҳимоя қилишда, шунингдек, минтақавий ва глобал барқарорликка салмоқли ҳисса қўшишда ҳал қилувчи роль ўйнайди", — деган Владимир Путин.

Унинг айтишича, сўнгги олти йил ичида Россия ҳарбий-денгиз кучлари Борей -А синфидаги бешта стратегик ракета сув ости кемаси ва Ясен-М синфидаги тўртта кўп мақсадли сув ости кемасини қабул қилган.

Путин яқин йилларда Ҳарбий-денгиз кучлари Борей синфидаги ядровий қувватга эга яна тўртта сув ости кемасини қабул қилишини маълум қилди.

“Уларнинг иккитаси ҳозирда қурилмоқда”,  —  дея аниқлик киритди Путин. 

Стокголм Халқаро Тинчлик Тадқиқотлари Институти (SIPRI) маълумотларига кўра, ҳозирги кунда Россия ҳарбий-денгиз флотида ядро қуролларини таший оладиган 12 та сув ости кемаси мавжуд бўлиб, улар 192 та ракета билан жиҳозланган.

Таққослаш учун, SIPRI маълумотлари шуни кўрсатадики, АҚШ ҳарбий-денгиз кучлари 280 та ракета билан қуролланган 14 та стратегик сув ости кемасига эга.