Путин “клон кабинетлар” қурдириб, ўзи Валдай ўрмонларида яширинмоқда — ОАВ

Тадқиқотчилар минглаб расмий видеоёзувларни таҳлил қилиб, бу кабинетлар деярли бир-бирига тўлиқ мос келишини аниқлаган. Улар фақат кичик тафсилотлар — эшик тутқичлари, девор безаклари, канцелярия буюмлари ва пардоздаги фарқлар билан ажралиб туради.

Тергов маълумотларига кўра, Путиннинг шундай кабинетлари Ново-Огарёв, Валдай ва Сочидаги қароргоҳларда жойлашган. Уларнинг барчаси бир хил дизайнда, қаймоқ рангда безатилган ва ўхшаш мебеллар билан жиҳозланган.

Манбаларга кўра, 2025-йил бошидан буён Путин асосан Валдайдаги клон кабинетда ишламоқда. Январдан сентябргача бўлган даврда унинг “қаймоқ ранг кабинет”даги 30 та чиқишидан 29 таси айнан Валдайда ёзиб олинган.

Бу қароргоҳ Россиянинг энг ҳимояланган ҳудудларидан бири ҳисобланади. Унинг атрофида 14 та ҳаво ҳужумидан мудофаа мажмуаси, шулардан 13 таси “Панцирь” тизими жойлаштирилган.

Сиёсатшунос Константин Гаазе фикрича, Путин Украина дронлари ҳужумидан хавотирланиб, Сочидаги очиқ майдонда жойлашган қароргоҳини тарк этган:

“Сочи тоғлар орасида очиқ жойда жойлашган. Манзарали бўлса-да, хавфсизлик нуқтаи назаридан ноқулай. Валдай эса ҳимояланган, яширин ва стратегик жойда жойлашган”, — дейди мутахассис.