Қуруқ ваъда: 1 йилдан буён газлаштирилмаган хонадонларга имтиёз бериш тартиби ишлаб чиқилмаяпти

2024 йил октябр ойида энергетика вазири Жўрабек Мирзамаҳмудов газ таъминотига уланмаган ҳовлиси бор уй-жойлар учун ҳам электр энергияси тарифига 50 фоизлик чегирма берилиши ва бу 2025 йил 1 январдан жорий этилиши режалаштирилаётганини айтганди. Бироқ орадан 1 йилдан кўпроқ вақт ўтган бўлса-да, мазкур тартиб жорий этилмади.

Ўзбекистон

30.10.2025, 08:19

Lotinchada

Улашиш:

Ўзбекистондаги газлаштирилмаган хонадонларга электр энергияси тўловлари учун имтиёзлар бериш тизими йил якунига қадар ҳукуматга киритилиши мумкин. Бу ҳақда 2025 йил 28 октябр куни Миллий матбуот марказида Энергетика вазирлиги томонидан ўтказилган матбуот анжуманида маълум қилинди.

Амалдаги қонунчиликка кўра, газлаштирилмаган кўп қаватли уйлар марказлашган электр тармоғига уланган бўлса, 50 фоиз электр энергиядан чегирма тақдим этилади. Бироқ ҳозирга қадар газлаштирилмаган ҳовлилар учун мазкур тартибни қўллаш бўйича қонунчиликка ўзгартишлар киритилмаган.

Мазкур хабарларга иқтисодчи Отабек Бакиров муносабат билдирди.

«Қишлоқ жойларда газлашмаган хонадонларда яшовчилар ўтган йили октябрда берилган ваъданинг ижросини ҳалиҳам кутмоқда ва бу кетишда яна кутади.

Албатта, масала биронта ўғри олигархга имтиёз бериш билан боғлиқ бўлганида неча кунда яширин қарор билан маъқуллаб берилган бўларди, билганлар билади. Лекин гап миллионлаб ўзбекистонликлар ҳақида кетмоқда. Ваъда ваъдалигича ёки режа режалигича қолиб кетиши эҳтимоли афсуски, яна жуда юқори, агар 2026 йил бюджетида газлашмаган хонадонларга имтиёз билан боғлиқ масала акс этмаган бўлса.

Ўзи буни имтиёз деб аташ ҳам ўринсиз, бу газлашмаган хонадонларда яшовчиларнинг ҳақи аслида. Бунга қўшимча субсидиялаш ҳам керакмас».

Ўзбекистон

30.10.2025, 08:19

Улашиш:

#газлашмаган хонадон #қуруқ ваъда

машҳур янгиликлар