Эрлинг Холанд билан бир кун. Қаҳва, машқ ва грилда гўшт

Кун қаҳва билан бошланади. Холанд уни «супер озуқа» деб атайди ва таъми дон сифати, сув ҳарорати ва тайёрланиш вақтига боғлиқ эканини айтади. Қаҳвадан кейин — тоза ҳавода қисқа сайр.

«Бу уйғонишга ва кунга мослашишга ёрдам беради», — дея таъкидлайди у.

Нонушта содда – қовурилган тухум, хамиртурушли нон ва кам миқдорда заранг сиропи қўшилган сут. Холанднинг айтишича, сут суяклар, тери ва мушаклар учун фойдали.

Холанд қиз дўсти — Изабелла билан яшайди, у ҳам олдин футбол ўйнаган. Улар ёшликда танишишган ва ҳозир нафақат уй, балки спорт ва овқатга бўлган муҳаббатни ҳам бўлишишади.

Футболчининг эътироф этишича, мустақил ҳаётга эрта ўрганган:

«16 ёшимдан ўзим яшаганман. Ўзим тозалаш ишларини қилганман, овқат пиширганман, ҳаммасини нольдан ўрганганман. Бу мени кўп нарсага ўргатди».

Нонуштадан кейин — шахсий физиотерапевт Марио билан иш. Холанд сон бўғими ҳаётийлиги учун машқлар қилади, чўзилиш ва куч элементларини қўшади.

«Аввалига бу қийин келган, аммо кейин режимнинг бир қисмига айланди», — дейди у.

Машғулотлар тикланишни ҳам ўз ичига олади: совуқ ванналар, сауна, бўшаштирувчи жараёнлар.

«Сен истамаган нарсани қиласан. Лекин бу қон айланиши ва интизомга ёрдам беради», — тушунтиради футболчи.

Холанднинг менюси содда: гўшт, балиқ, сабзавот, сут ва асал. У гўштни грилда пиширади, натижага эса деталлар таъсир қилади: ҳарорат, вақт, сабр. Изабелла гарнир ва соуслар тайёрлашда ёрдам беради.

«Бирга овқат тайёрлаш — сермашғул кундан кейин уйда вақт ўтказиш усули», — дейди Холанд.

Кечқурун — кечки овқат ва дам олиш. Холанд бу пайтни машғулотлардан ташқари муҳим деб ҳисоблайди.

Дунёнинг энг танилган ҳужумчиларидан бирининг куни шу тарзда ўтади: режим, машғулот ва оддий одатлар унинг асоси бўлиб қолмоқда.