Ўзбекистон, Туркия ва Озарбайжон ўртасида Анқара декларацияси имзоланди (фото)
Кеча, 29 январь куни Ўзбекистон, Туркия ҳамда Озарбайжон Ташқи ишлар вазирлари Туркияда бўлиб ўтаётган форумда Анқара декларациясини қабул қилди. Бу ҳақда Ўзбекистон ТИВ раҳбари Бахтиёр Саидов ўзининг Telegram'даги саҳифасида маълум қилди.
Oʻzbekiston, Turkiya va Ozarbayjon oʻrtasida Anqara deklaratsiyasi imzolandi (foto)
Бахтиёр Саидовнинг ёзишича, у дастлаб Туркия Президенти Ражаб Тоййиб Эрдўған билан кўришиб, унга Президент Шавкат Мирзиёевнинг мактубини топширган.
"Туркия Президенти Ражаб Тоййиб Эрдўғанжаноби олийлари томонидан қабул қилинганимиздан хурсандмиз. Ўзбекистон Республикаси Президенти Шавкат Мирзиёев жаноби олийларининг энг самимий саломлари ва мактубини етказдик. Раҳбарларимиз ўртасида ўрнатилган биродарлик ришталари ҳар бир соҳада яқин ҳамкорлик қилиш учун энг мустаҳкам пойдевор яратмоқда. Минг йиллик тарих, анъана ва урф-одатлар билан боғлиқ бўлган халқларимиз фаровон келажакни барпо этиш йўлида бир-бири билан яқиндан ҳамкорлик қилмоқда", дея Саидов бу ҳолатни қайд этган.
Шундан сўнг, вазир Ташқи ишлар, савдо, иқтисодиёт ва транспортга масъул вазирлар билан биргаликда икки-уч томонлама учрашувларни ўтказган.
"Самарали дипломатия, динамик сармоявий ҳамкорлик, савдо ҳажмини ошириш ва алоқаларни кенгайтириш орқали уч қардош халқлар нафақат ўзлари, балки вакиллик қилаётган минтақалар учун ҳам фойда келтиради", дейди у.
Унинг қўшимча қилишича, мазкур форумда фақатгина эришилган ютуқлар ҳақида эмас, балки энг долзарб масалалар ҳақида ҳам музокаралар олиб борилган.
"Учрашувимизнинг асосий натижаси халқларимизнинг барқарор ривожланиши учун дўстлигимиз ва ҳамкорлигимизни мустаҳкамлаш йўлидаги муҳим қадам бўлган Анқара декларациясининг имзоланиши бўлди", дея бу ҳолатни эслайди вазир Саидов.
