Туркия Европа Иттифоқига аъзо бўлиш мақсадидан воз кечмаганини маълум қилди

Бу ҳақда мамлакат ташқи ишлар вазири Ҳакан Фидан Анқарада Европа Иттифоқининг юқори мартабали вакиллари билан ўтказилган учрашув якунлари бўйича маълум қилди.

Учрашувда Туркия–Европа Иттифоқи муносабатларининг долзарб йўналишлари, жумладан ташқи сиёсат, савдо, миграция, виза тартиби ва транспорт алоқаларини ривожлантириш масалалари муҳокама қилинди. Шунингдек, Яқин Шарқдаги вазият ҳамда Россия–Украина уруши каби минтақавий ва глобал масалалар юзасидан фикр алмашилди.

Ҳакан Фидан Туркия президенти Ражаб Тоййиб Эрдўғаннинг аввалги баёнотларини эслатиб, Европа Иттифоқига аъзолик Анқара учун ҳануз стратегик мақсад бўлиб қолаётганини таъкидлади.

«Биз Европа Иттифоқининг Туркия билан муносабатларини камситишсиз, объектив мезонлар ва қадриятлар асосида ривожлантиришини кутамиз», — деди Фидан.

Унинг сўзларига кўра, Туркия мазкур тамойиллар асосида Европа Иттифоқи билан ҳамкорликни янада мустаҳкамлашга тайёр.

Туркия дипломатик манбалари маълум қилишича, Ҳакан Фидан Анқарада Европа Иттифоқининг ташқи сиёсат ва хавфсизлик бўйича олий вакили Кажа Каллас, кенгайиш масалалари бўйича комиссар Марта Кос ҳамда ички ишлар ва миграция бўйича комиссар Магнус Бруннер билан учрашган.

Европа Иттифоқи вакилларининг Туркияга икки кунлик ташрифи НАТО саммити арафасида бўлиб ўтди. Ҳакан Фидан ушбу ташриф Туркия ва Европа Иттифоқи ўртасидаги муносабатларни янги босқичга олиб чиқиш йўлидаги муҳим қадам бўлишига умид билдирди.