“Биз ҳукуматлар қарорини бекор қилоладиган қирол эмасмиз” – Инфантино

FIFA президенти Жанни Инфантино жаҳон чемпионати учун АҚШга кириб келаётган ўйинчилар ва расмийларнинг давом этаётган виза муаммолари юзасидан билдирилган хавотирларга жавоб берар экан, жаҳон футбол ташкилоти раҳбарлари “дунё қироллари” эмаслиги ва ҳукумат қарорларини бекор қила олмаслигини таъкидлади.

Чоршанба куни турнир арафасида оммавий ахборот воситалари саволларига жавоб берган Инфантино, FIFA “спорт ташкилоти” бўлишга эътибор қаратаётганини ва АҚШнинг мамлакатга киришни тасдиқлаш қарорларига аралашмаслигини айтди.

“Биз ҳамиша ечим топишга ҳаракат қиламиз – ҳамиша”, – деди Инфантино Мехико шаҳридаги матбуот анжуманида. “Лекин шуни ҳам тан олишимиз керакки, биз ҳукуматлар ва полиция кучлари устидан ҳукмронлик қила оладиган дунё ҳукмдорлари эмасмиз. Биз спорт ташкилотимиз; қўлимиздаги имкониятлар доирасида энг яхшисини қилишга интиламиз”.

Шу ҳафта бошида АҚШ Жаҳон чемпионатида иштирок этиши режалаштирилган сомалилик ҳакам Омар Артанни амалдаги визаси бўлишига қарамай мамлакатга киритишни бекор қилди.

АҚШ ҳакамни мамлакатга киритмагани сабабли FIFA уни турнир рўйхатидан чиқарди.

FIFA раҳбарининг матбуот анжумани АҚШ президенти Доналд Трампнинг изоҳларидан сўнг бўлиб ўтди. Трампнинг айтишича, унинг маъмурияти Жаҳон чемпионати учун мамлакатга “керакли одамлар” келишини таъминлаш устида иш олиб бормоқда.

Эрон билан уруш 

Бу йилги Жаҳон чемпионати 1930 йилда ташкил этилганидан бери илк бор мезбон мамлакат ўзи уришаётган давлатни қабул қиладиган мусобақа эканлиги билан аҳамиятли.

АҚШ-Исроилнинг Эронга қарши уруши энг йирик жаҳоншумул спорт тадбирини геосиёсий беллашувга айлантириб қўйгандек.

Эронлик футболчиларга Лос-Анжелесдаги илк ўйинидан 10 кун олдин АҚШга кириш визалари берилди.

Машғулотларини Мексикага кўчирган ҳамда АҚШдаги ўйинларга қатнаб, сўнг Тихуанага қайтиб келадиган Эрон терма жамоасининг ҳолати ҳақида берилган саволга ҳам мужмал бўлса-да, жавоб берди FIFA раҳбари.

“Мен бемалол ўтириб, ҳеч нарса қилмаслик керак демоқчи эмасман. Аксинча, бизга ишонишингизни сўрайман: биз парда ортида ишлаяпмиз, вазиятни тушунишга ҳаракат қиляпмиз”, - деди у. “Бизга айтиладиган ва айтилмайдиган гаплар бор. Биз доим ишларни ижобий ҳал қилишга ва ечим топишга интиламиз”.