“Biz hukumatlar qarorini bekor qiloladigan qirol emasmiz” – Infantino

FIFA prezidenti Janni Infantino jahon chempionati uchun AQSHga kirib kelayotgan o‘yinchilar va rasmiylarning davom etayotgan viza muammolari yuzasidan bildirilgan xavotirlarga javob berar ekan, jahon futbol tashkiloti rahbarlari “dunyo qirollari” emasligi va hukumat qarorlarini bekor qila olmasligini ta’kidladi.

Chorshanba kuni turnir arafasida ommaviy axborot vositalari savollariga javob bergan Infantino, FIFA “sport tashkiloti” bo‘lishga e’tibor qaratayotganini va AQShning mamlakatga kirishni tasdiqlash qarorlariga aralashmasligini aytdi.

“Biz hamisha yechim topishga harakat qilamiz – hamisha”, – dedi Infantino Mexiko shahridagi matbuot anjumanida. “Lekin shuni ham tan olishimiz kerakki, biz hukumatlar va politsiya kuchlari ustidan hukmronlik qila oladigan dunyo hukmdorlari emasmiz. Biz sport tashkilotimiz; qo‘limizdagi imkoniyatlar doirasida eng yaxshisini qilishga intilamiz”.

Shu hafta boshida AQSh Jahon chempionatida ishtirok etishi rejalashtirilgan somalilik hakam Omar Artanni amaldagi vizasi bo‘lishiga qaramay mamlakatga kiritishni bekor qildi.

AQSh hakamni mamlakatga kiritmagani sababli FIFA uni turnir ro‘yxatidan chiqardi.

FIFA rahbarining matbuot anjumani AQSh prezidenti Donald Trampning izohlaridan so‘ng bo‘lib o‘tdi. Trampning aytishicha, uning ma’muriyati Jahon chempionati uchun mamlakatga “kerakli odamlar” kelishini ta’minlash ustida ish olib bormoqda.

Eron bilan urush 

Bu yilgi Jahon chempionati 1930-yilda tashkil etilganidan beri ilk bor mezbon mamlakat o‘zi urishayotgan davlatni qabul qiladigan musobaqa ekanligi bilan ahamiyatli.

AQSH-Isroilning Eronga qarshi urushi eng yirik jahonshumul sport tadbirini geosiyosiy bellashuvga aylantirib qo‘ygandek.

Eronlik futbolchilarga Los-Anjelesdagi ilk o‘yinidan 10 kun oldin AQSHga kirish vizalari berildi.

Mashg‘ulotlarini Meksikaga ko‘chirgan hamda AQSHdagi o‘yinlarga qatnab, so‘ng Tixuanaga qaytib keladigan Eron terma jamoasining holati haqida berilgan savolga ham mujmal bo‘lsa-da, javob berdi FIFA rahbari.

“Men bemalol o‘tirib, hech narsa qilmaslik kerak demoqchi emasman. Aksincha, bizga ishonishingizni so‘rayman: biz parda ortida ishlayapmiz, vaziyatni tushunishga harakat qilyapmiz”, - dedi u. “Bizga aytiladigan va aytilmaydigan gaplar bor. Biz doim ishlarni ijobiy hal qilishga va yechim topishga intilamiz”.