Ўзбекистон U-20 терма жамоаси Осиё кубоги финал босқичига йўл олди

2027 йилнинг 24 мартидан 10 апрелига қадар Хитойда футбол бўйича 20 ёшгача бўлганлар ўртасидаги Осиё кубоги финал босқичи бўлиб ўтади.

Қитъа биринчилигида 16 жамоа иштирок этади. Мезбон Хитой терма жамоасидан ташқари қолган 15 иштирокчи жамоанинг номи маълум бўлди.

Мамлакатимиз саралаш босқичининг "B" гуруҳи баҳсларига мезбонлик қилди. Унда Ўзбекистон, Сурия, Ҳиндистон ва Бангладеш U20 терма жамоалари ўзаро куч синашди. Гуруҳдаги ҳал қилувчи баҳсда вакилларимиз Сурия терма жамоасини 3:0 ҳисобида мағлубиятга учратди.

Саралаш босқичи якунларига кўра, ўз гуруҳларида биринчи ўринни эгаллаган Ўзбекистон, Жанубий Корея, Шимолий Корея, Тожикистон, Саудия Арабистони, Ироқ, Япония ва Индонезия терма жамоалари финал босқичига тўғридан-тўғри йўлланмани қўлга киритди.

Шунингдек, саралашда энг яхши натижа қайд этган иккинчи ўрин соҳиблари — Ливан, Уммон, Эрон, Иордания, Таиланд, Ҳиндистон ва Малайзия терма жамоалари ҳам Хитойдаги қитъа биринчилигида иштирок этишади.

2027 йилги U20 Жаҳон чемпионатига Ўзбекистон ва Озарбайжон мезбонлик қилади. Шу боис Ўзбекистон ёшлар терма жамоаси Осиё кубогида қайд этадиган натижасидан қатъи назар, мезбон сифатида Жаҳон чемпионатида ҳам иштирок этади.