Мундиал очган имконият: Беҳруз Каримов Top-5 остонасида

Энди эса унинг номи Европа клублари билан боғланмоқда.

Одил Аҳмедов футбол мактаби тарбияланувчиси бўлган Каримов 2024 йилда «Олимпик» сафида Суперлигадаги дебютини ўтказди. 2025 йил бошида эса Термизнинг «Сурхон» жамоасига ўтиб, мамлакат чемпионатида 15 та учрашувда майдонга тушди ва 3 та гол уришга муваффақ бўлди.

Унинг асосий позицияси – ўнг қанот ҳимоячиси. Зарурат туғилганда ўнг қанот ярим ҳимоячиси ва чап қанот ҳимоясида ҳам ҳаракат қила олади. Беҳрузнинг асосий устунликлари – юқори тезлик, ҳужумга фаол қўшилиши, кучли зарбаси ва катта ҳажмдаги ишни бажара олишидир.

«Сурхон»даги ёрқин ўйинларидан сўнг Каримов Ўзбекистон U-23 терма жамоасининг асосий футболчиларидан бирига айланди. Осиё кубогида Жанубий Корея дарвозасига урган голи унинг ҳужумкор салоҳиятини яна бир бор намоён қилди. Бундан аввал эса U-17 Жаҳон чемпионатида Испанияга қарши баҳсда урилган голлардан бирига голли узатма берганди.

Миллий терма жамоа бош мураббийи Фабио Каннаваро ҳам ёш футболчининг ўйинларини эътиборсиз қолдирмади. Италиялик мутахассис уни Жаҳон чемпионати олдидан миллий жамоага жалб қилди.

Мундиал арафасида Каримов жиддий жароҳат олгани сабаб унинг турнирдаги иштироки сўроқ остида қолган эди. Шунга қарамай, Каннаваро футболчига ишонч билдирди ва унинг тўлиқ тикланишини кутди.

Мураббийнинг бу қарори ўзини оқлади. Беҳруз Жаҳон чемпионатида Колумбия ва Португалияга қарши учрашувларда асосий таркибда майдонга тушди. Айниқса, Колумбияга қарши баҳсда узоқ масофадан йўллаган кучли зарбаси футбол мухлислари ва мутахассислар эътиборини тортди. Тўп дарвозадан жой олмаган бўлса-да, ушбу эпизод ижтимоий тармоқларда мундиалнинг энг чиройли вазиятларидан бири сифатида кенг муҳокама қилинди.

Португалияга қарши учрашув эса Беҳруз учун алоҳида аҳамият касб этди. Айнан шу баҳсда у Криштиану Роналду билан бир майдонда ҳаракат қилди. Улар ўртасидаги 22 йилу 183 кунлик ёш тафовути Жаҳон чемпионатлари тарихидаги энг катта ёш фарқи сифатида қайд этилди.

Мундиалдаги ишончли ўйинларидан сўнг Каримовга бўлган қизиқиш янада кучайди. Маълумотларга кўра, Португалияга қарши учрашувни стадиондан икки Англия, битта Германия ва битта Франция клуби скаутлари кузатган. Улар диққат марказидаги футболчилардан бири айнан Беҳруз Каримов бўлгани айтилмоқда.

Бу бежиз эмас. Замонавий футболда қанот ҳимоячиларига талаб жуда юқори. Ҳимояда ишончли ўйнаш билан бирга ҳужумга фаол қўшила оладиган футболчилар трансфер бозорида доимо юқори баҳоланади. Каримов эса айнан шу хусусиятлари билан ажралиб туради.

Атиги 18 ёшида у Суперлига, U-23 Осиё кубоги ва Жаҳон чемпионати каби турли даражадаги мусобақаларда ўзини намоён қилишга улгурди.

Бугунги кунда унинг трансфери ҳақидаги гап-сўзлар тобора кучаймоқда. Ҳозирча қайси клублар қизиқиш билдираётгани расман очиқланмаган. Бироқ Англия, Германия ва Франциянинг Top-5 чемпионатларида иштирок этадиган клублар скаутлари футболчини шахсан кузатгани унинг Европага йўл олиш эҳтимоли юқори эканини кўрсатмоқда.

«Кўҳна қитъа»га трансфер амалга ошадими ёки йўқ, буни вақт кўрсатади. Аммо бир нарса аниқ — Беҳруз Каримов аллақачон Европа грандлари эътиборига тушишга муваффақ бўлди.

Гарчанд Ўзбекистон терма жамоаси Жаҳон чемпионатида кутилган натижани қайд эта олмаган бўлса-да, Беҳруз Каримов ва Аббос Файзуллаев каби ёш футболчиларнинг ишончли ўйини Европа клублари эътиборини тортгани ўзбек футболи учун муҳим ютуқ ҳисобланади. 

Рамазон Усанов