Пекиндаги баланд бинога самолёт урилди

27 июнь куни кичик самолёт Хитой пойтахтидаги осмонўпар бинога урилди. Бу дунёнинг энг кучли қўриқланадиган шаҳарларидан бирида содир бўлган ҳайратланарли воқеадир.

Ижтимоий тармоқларда тарқалган ва Пекинда олинган кадрларда “China Зун ” номи билан ҳам машҳур бўлган 109 қаватли CITIC Tower биносидан парчаланган бўлаклар қулагани, шунингдек, ерда ётган самолётнинг дум қисми ва таксининг синган ойнаси акс этган.

Воқеа жойига кўплаб полиция ходимлари жалб қилинган, бинога олиб борувчи айрим йўллар автомобиллар учун ёпиб қўйилган.

Баланд қаватдаги иккита ойна панели шикастланган.

Бино яқинида тўпланганлар орасида турган курьернинг айтишича, у маҳаллий вақт билан соат 18:00 атрофида яқин жойдан қаттиқ гумбурлаган овозни эшитгач, CITIC минораси томон шошилган, минорага тахминан автомобиль катталигидаги учувчи аппарат келиб урилган.

Полиция тасвирларни ўчиртирмоқда

Курьер йигитнинг айтишича, у бинодан чиқиб турган самолётни видеога олган, бироқ кейинроқ полиция қўлига тушишдан қўрқиб, уни ўчириб ташлаган.

Воқеа жойига етиб борган Reuters журналистларининг хабарига кўра, ўнлаб полиция ва бир нечта ўт ўчириш машиналари яқин атрофдаги йўлларда саф тортиб турибди.

Полиция одамларни бинодан узоқлаштириб, уларнинг суратга олишига қаршилик кўрсатмоқда. Аллақачон олинган тасвирларни эса ўчиришни талаб қилган.

Жума куни бино ҳақидаги постлар Хитой ижтимоий тармоқларидан зудлик билан олиб ташланди.

“Xiaohongshu” ёки “Red Note” иловасида бино номи қидирилганда фақат пайшанба кунги ёзувларгина чиқмоқда.

Полиция “Reuters” журналистларига у ердан кетишни буюрган. Сабабини сўрашганида, “Сабабини ҳаммамиз яхши биламиз!” – деб жавоб берган ходим.