Тоқаев ҳукумат танқидчиларини жиддий огоҳлантирди

“Шундай нодон, ўз манфаатини кўзлайдиган одамларнинг салбий таъсирига тушиб қолган айрим ёшлар интернетда турли миш-мишлар ёки жамиятни бўлиб юборадиган, фитна чиқарадиган материаллар жойламоқда. Лекин бу ерда бир нуқта бор. Замонавий технологиялардан фойдаланган ҳолда, тегишли идоралар бундай бузғунчи ёзувларни тарқатаётганларнинг шахсини ва яшаш манзилини аниқлайди”, — деган Тоқаев.

Президентнинг таъкидлашича, “ҳукумат ва ҳокимларнинг фаолияти ҳам бехато эмас”. Аммо у танқид билдиришда “жамиятда низо ва провокацияга сабаб бўлмаслик кераклигини”, чунки “барқарорлик — энг муҳим устувор масала” эканини қайд этди. Тўқайов айнан қандай “ёлғон ахборот” ёки “провокациялар” ҳақида гапирганини очиқламади.

Эътиборлиси, Тоқаев бу каби баёнотларни биринчи марта қилаётгани йўқ. Масалан, жорий йил апрелида Қозоғистон халқи ассамблеяси йиғилишида у ҳуқуқ ҳимоячилари ва журналистларни, жумладан чет элга кетганларни ҳам, “мамлакатда тинчликни издан чиқаришга қаратилган провокациялар”да айблаган, шунингдек, уларни “киноя, очкўзлик ва Қозоғистонга бефарқлик”да қоралаган эди.

Бундан аввалроқ Миллий қурултой йиғилишида ҳам Тоқаев кўплаб мамлакатларга “шундай деб аталадиган демократик қадриятлар, жумладан, ЛГБТ”ни “тиқиштириш” ҳақида гапирган. У нодавлат фондлар ва турли ташкилотларни “бошқа давлатларнинг ички ишларига қўпол аралашишда” айблаган.