Toqayev hukumat tanqidchilarini jiddiy ogohlantirdi

“Shunday nodon, oʻz manfaatini koʻzlaydigan odamlarning salbiy taʼsiriga tushib qolgan ayrim yoshlar internetda turli mish-mishlar yoki jamiyatni boʻlib yuboradigan, fitna chiqaradigan materiallar joylamoqda. Lekin bu yerda bir nuqta bor. Zamonaviy texnologiyalardan foydalangan holda, tegishli idoralar bunday buzgʻunchi yozuvlarni tarqatayotganlarning shaxsini va yashash manzilini aniqlaydi”, — degan Toqayev.

Prezidentning taʼkidlashicha, “hukumat va hokimlarning faoliyati ham bexato emas”. Ammo u tanqid bildirishda “jamiyatda nizo va provokatsiyaga sabab boʻlmaslik kerakligini”, chunki “barqarorlik — eng muhim ustuvor masala” ekanini qayd etdi. Toʻqayov aynan qanday “yolgʻon axborot” yoki “provokatsiyalar” haqida gapirganini ochiqlamadi.

Eʼtiborlisi, Toqayev bu kabi bayonotlarni birinchi marta qilayotgani yoʻq. Masalan, joriy yil aprelida Qozogʻiston xalqi assambleyasi yigʻilishida u huquq himoyachilari va jurnalistlarni, jumladan chet elga ketganlarni ham, “mamlakatda tinchlikni izdan chiqarishga qaratilgan provokatsiyalar”da ayblagan, shuningdek, ularni “kinoya, ochkoʻzlik va Qozogʻistonga befarqlik”da qoralagan edi.

Bundan avvalroq Milliy qurultoy yigʻilishida ham Toqayev koʻplab mamlakatlarga “shunday deb ataladigan demokratik qadriyatlar, jumladan, LGBT”ni “tiqishtirish” haqida gapirgan. U nodavlat fondlar va turli tashkilotlarni “boshqa davlatlarning ichki ishlariga qoʻpol aralashishda” ayblagan.