Тошкентда банк ходими 120 минг доллар кредит маблағини қиморга тикди

Бош прокуратура ҳузуридаги Департаментнинг Яшнобод тумани бўлими томонидан тижорат банкининг мурожаати асосида ўтказилган терговга қадар текширувлар натижасида маълум бўлишича, Яшнобод туманида жойлашган банк филиалида бўлим бошлиғи лавозимида ишлаб келган Э.Н. жиноий шериклари билан тил бириктирган ҳолда қонунга хилоф равишда ҳаракат қилган.

Хусусан, у “A.” МЧЖ масъул шахслари ва бошқалар билан ўзаро келишган ҳолда “B.B.” МЧЖ номига 120 минг АҚШ доллари миқдорида кредит расмийлаштирилишига эришган. Кейинчалик мазкур кредит маблағлари қалбаки ҳужжатлар расмийлаштириш орқали нақд пулга айлантирилиб, интернет орқали қимор ва таваккалчиликка асосланган ўйинларга сарфланган.

Натижада банкка 120 минг АҚШ доллари миқдорида моддий зарар етказилган.

Мазкур ҳолат юзасидан Ўзбекистон Республикаси Жиноят кодексининг 167-моддаси (ўзлаштириш ёки растрата йўли билан талон-торож қилиш) ҳамда 228-моддаси (ҳужжатлар, штамплар, муҳрлар ва бланкаларни тайёрлаш, қалбакилаштириш ёки улардан фойдаланиш) билан жиноят иши қўзғатилди.

Ҳозирда тергов ҳаракатлари олиб борилмоқда.