Toshkentda bank xodimi 120 ming dollar kredit mablagʻini qimorga tikdi

Bosh prokuratura huzuridagi Departamentning Yashnobod tumani boʻlimi tomonidan tijorat bankining murojaati asosida oʻtkazilgan tergovga qadar tekshiruvlar natijasida maʼlum boʻlishicha, Yashnobod tumanida joylashgan bank filialida boʻlim boshligʻi lavozimida ishlab kelgan E.N. jinoiy sheriklari bilan til biriktirgan holda qonunga xilof ravishda harakat qilgan.

Xususan, u “A.” MChJ masʼul shaxslari va boshqalar bilan oʻzaro kelishgan holda “B.B.” MChJ nomiga 120 ming AQSh dollari miqdorida kredit rasmiylashtirilishiga erishgan. Keyinchalik mazkur kredit mablagʻlari qalbaki hujjatlar rasmiylashtirish orqali naqd pulga aylantirilib, internet orqali qimor va tavakkalchilikka asoslangan oʻyinlarga sarflangan.

Natijada bankka 120 ming AQSh dollari miqdorida moddiy zarar yetkazilgan.

Mazkur holat yuzasidan Oʻzbekiston Respublikasi Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) hamda 228-moddasi (hujjatlar, shtamplar, muhrlar va blankalarni tayyorlash, qalbakilashtirish yoki ulardan foydalanish) bilan jinoyat ishi qoʻzgʻatildi.

Hozirda tergov harakatlari olib borilmoqda.