Пулли парковка бўйича аукцион қайта ўтказилиши керакми?

Тошкентда жорий этилган пулли парковка тизими атрофида мунозаралар давом этар экан, Ўзбекистон Халқ демократик партияси аҳоли манфаатларини инобатга олган ҳолда бир қатор таклифларни илгари сурди. Яъни, тарифларни белгилашда аҳолининг реал даромадлари ва ижтимоий эҳтиёжлари ҳисобга олиниши, йиғилаётган маблағлар қаерга сарфланиши ҳақида тўлиқ очиқ маълумот тақдим этилиши шарт.

Ўзбекистон

22.11.2025, 10:14

Lotinchada

Улашиш:

Партиянинг билдиришича, тариф сиёсати, ижтимоий ҳимоя ва очиқликка оид талаблар жамоатчилик учун муҳим ҳисобланади.

ХДП қуйидаги шартларни белгилади:

тарифларни белгилашда аҳолининг реал даромадлари ва ижтимоий эҳтиёжлари ҳисобга олиниши;
йиғилаётган маблағлар қаерга сарфланиши ҳақида тўлиқ очиқ маълумот тақдим этилиши;
давлат шифохоналари, «Инсон» марказлари, кутубхоналар каби ижтимоий объектлар олдида маълум вақт бепул тўхташ имкони яратилиши;
хусусий ва жамоат объектларидаги парковкаларнинг камида 5 фоизи имтиёзли тоифалар учун бепул ажратилиши;
«тўхташ мумкин эмас» белгиси бўлган жойларда пулли тўхташ жойи ташкил этилишининг тўхтатилиши.

Шу билан бирга, айрим кузатувчилар ва фаоллар бу талабларни амалга ошириш амалда мумкин эмаслигини таъкидламоқда. Уларга кўра, авваламбор ўтган йилги пулли парковка бўйича аукцион натижалари бекор қилиниши ва мазкур жараён янгидан, шаффоф ва рақобатли тарзда ўтказилиши зарур.

Танқидчиларнинг таъкидлашича, амалдаги операторни танлаш жараёни бўйича жиддий шубҳалар мавжуд ва коррупция ҳақидаги эътирозлар жамоатчиликда кескин норозилик уйғотган.

Улар парковка тизими операторлиги аввал давлатга қайтарилиши, шундан кейин очиқ аукцион орқали янги танлов ўтказилиши кераклигини айтишмоқда. Янги танловда иштирокчилар Тошкент аҳолисининг талабларини олдиндан инобатга олган ҳолда иштирок этиши ва молиявий кафолатга эга бўлиши шарт экани таъкидланмоқда.

Муаммога оид муҳокамалар давом этмоқда.

Ўзбекистон

22.11.2025, 10:14

Улашиш:

#тошкент #ХДП #пулли парковка

мавзуга оид янгиликлар