Трамп "учувчи сарой"ни қабул қилди

Вазирлик матбуот котиби Шон Парнеллнинг сўзларига кўра, самолёт "тегишли хавфсизлик чораларини таъминлаш ва функционал талабларга жавоб бериши" учун қайта жиҳозланади ва шундан сўнг "Аir Force One" президент борти сифатида фойдаланилади.

CNN'га маълумот берган амалдаги ва собиқ амалдорлар бу модернизация жараёни икки йилгача давом этиши ва самолёт асл нархидан бир неча баравар қимматга тушишини таъкидлаган.

Шу билан бирга, телеканал манбаларидан бири самолёт топшириш келишуви ҳали якунланмаганини ва юридик жамоалар ўртасидаги музокаралар давом этаётганини айтган.

Трамп маъмурияти Қатар қироллик оиласидан ҳашаматли "Boeing 747-8" самолётини совға сифатида қабул қилишга тайёргарлик кўраётгани ҳақида илк бор 12 май куни ОАВда хабарлар чиққан эди.

Режаларга кўра, АҚШ президентининг ҳозирги ваколат муддати тугагач, ушбу "учувчи сарой" мулки Трампнинг президент кутубхонаси жамғармасига ўтади.

2025 йил январь ойида Трамп Оқ уйга қайтгач, АҚШ ҳарбий-ҳаво кучлари Boeing билан боғланган, бироқ компания янги президент самолётини эски борт ўрнига икки йилгача етказиб бера олмаслигини билдирган. Трамп маъмурияти кутишни хоҳламай, Боэинғнинг бутун дунё бўйлаб мижозлари рўйхатини олган. Бу рўйхатда Қатар ҳам бўлган ва шу билан музокаралар бошланган.

"Дастлаб самолётни сотиб олиш режалаштирилган эди", - деб ёзади CNN. Бироқ Қатар қироллик оиласи уни совға қилишга тайёрлигини билдирган.

CNN Телеканал таъкидлашича, АҚШ Демократик партияси вакиллари билан бир қаторда, одатда Трампга содиқлик кўрсатадиган бир нечта нуфузли республикачилар ҳам Трампнинг Қатар совғасини қабул қилаётганидан норози бўлмоқда ва бу ҳаракатни ноэтик деб ҳисобламоқда.

АҚШ Конституцияси ҳукумат аъзоларига хорижий давлатлардан Конгресс розилигисиз совға қабул қилишни таъқиқлайди. Аввалроқ Конгресс президентлар ва бошқа давлат хизматчиларига қиймати 480 доллардан ошмайдиган совғаларни ўзида қолдиришга рухсат берган, ундан қиммат совғалар эса автоматик равишда давлат мулкига айлантирилади.

Демократ сенатор Чак Шумер ҳам самолётларни президент эҳтиёжлари учун қайта жиҳозлашда Пентагон маблағларидан фойдаланишни тақиқловчи қонун лойиҳасини тақдим этди. 

Шумерга кўра, бундай самолётларни қандай бўлмасин модификация қилиш уларнинг тўлиқ хавфсизлигини кафолатлай олмайди.