Tramp "uchuvchi saroy"ni qabul qildi

Vazirlik matbuot kotibi Shon Parnellning soʻzlariga koʻra, samolyot "tegishli xavfsizlik choralarini taʼminlash va funksional talablarga javob berishi" uchun qayta jihozlanadi va shundan soʻng "Air Force One" prezident borti sifatida foydalaniladi.

CNN'ga maʼlumot bergan amaldagi va sobiq amaldorlar bu modernizatsiya jarayoni ikki yilgacha davom etishi va samolyot asl narxidan bir necha baravar qimmatga tushishini taʼkidlagan.

Shu bilan birga, telekanal manbalaridan biri samolyot topshirish kelishuvi hali yakunlanmaganini va yuridik jamoalar oʻrtasidagi muzokaralar davom etayotganini aytgan.

Tramp maʼmuriyati Qatar qirollik oilasidan hashamatli "Boeing 747-8" samolyotini sovgʻa sifatida qabul qilishga tayyorgarlik koʻrayotgani haqida ilk bor 12 may kuni OAVda xabarlar chiqqan edi.

Rejalarga koʻra, AQSh prezidentining hozirgi vakolat muddati tugagach, ushbu "uchuvchi saroy" mulki Trampning prezident kutubxonasi jamgʻarmasiga oʻtadi.

2025 yil yanvar oyida Tramp Oq uyga qaytgach, AQSh harbiy-havo kuchlari Boeing bilan bogʻlangan, biroq kompaniya yangi prezident samolyotini eski bort oʻrniga ikki yilgacha yetkazib bera olmasligini bildirgan. Tramp maʼmuriyati kutishni xohlamay, Boeingʻning butun dunyo boʻylab mijozlari roʻyxatini olgan. Bu roʻyxatda Qatar ham boʻlgan va shu bilan muzokaralar boshlangan.

"Dastlab samolyotni sotib olish rejalashtirilgan edi", - deb yozadi CNN. Biroq Qatar qirollik oilasi uni sovgʻa qilishga tayyorligini bildirgan.

CNN Telekanal taʼkidlashicha, AQSh Demokratik partiyasi vakillari bilan bir qatorda, odatda Trampga sodiqlik koʻrsatadigan bir nechta nufuzli respublikachilar ham Trampning Qatar sovgʻasini qabul qilayotganidan norozi boʻlmoqda va bu harakatni noetik deb hisoblamoqda.

AQSh Konstitutsiyasi hukumat aʼzolariga xorijiy davlatlardan Kongress roziligisiz sovgʻa qabul qilishni taʼqiqlaydi. Avvalroq Kongress prezidentlar va boshqa davlat xizmatchilariga qiymati 480 dollardan oshmaydigan sovgʻalarni oʻzida qoldirishga ruxsat bergan, undan qimmat sovgʻalar esa avtomatik ravishda davlat mulkiga aylantiriladi.

Demokrat senator Chak Shumer ham samolyotlarni prezident ehtiyojlari uchun qayta jihozlashda Pentagon mablagʻlaridan foydalanishni taqiqlovchi qonun loyihasini taqdim etdi. 

Shumerga koʻra, bunday samolyotlarni qanday boʻlmasin modifikatsiya qilish ularning toʻliq xavfsizligini kafolatlay olmaydi.