Туркияда Истанбул мери ҳибсга олиниши ортидан оммавий намойишлар бошланди

Қайд этилишича, намойишчилар Истанбул шаҳар ҳокимлиги, Имомўғли сақланилаётган полиция бўлими, Истанбул университети ва бошқа жойларда йиғилиб, турли шиорлар билан митинглар уюштирмоқда. Мамлакат полицияси эса шаҳар ҳокимлигини ўраб олган, йўлларнинг бир қисми ҳамда Таксимнинг марказий майдонини тўсиб қўйган. 

"Бу тўнтаришга уриниш бўлди. Акром Имомўғлининг президентликка номзод бўлиш эркинлиги тортиб олинмаяпти, бу миллатдан уни сайлаш эркинлиги тортиб олинмоқда", дейди Республика халқ партияси раҳбари Озгур Озел шаҳар ҳокимлиги биносида йиғилганлар олдида қилган нутқида.

Воқеа жойидан олинган кадрларга кўра, полиция Истанбул университети ҳудудида талабаларни тарқатиб юбориш учун махсус воситалардан фойдаланмоқда. Улар Акром Имомўғлининг олий маълумот тўғрисидаги дипломи бўлмагани учун, президентлик сайловида иштирок эта олмаслиги қарорига нисбатан норозилик билдириб чиққан. Қарор сиёсатчи ҳибсга олинишидан бироз олдин қабул қилинган. 

Якшанба куни бўлиб ўтадиган Республика халқ партияси қурултойида Акром Имомўғли 2028 йилда бўлиб ўтадиган президентлик сайловларида мухолифат номзоди сифатида эълон қилиниши кутилган эди. Туркияда муддатидан олдинги сайловлар 2027 йил ноябрь ойида бўлиб ўтиши мумкин. 

Айтилишича, Имомўғли коррупция ва террористик ташкилотлар билан алоқадорликда тергов қилинмоқда. Тергов доирасида 100 га яқин одам, жумладан сиёсатчилар, журналистлар ва ишбилармонлар ҳибсга олинган. 

Имомўғли ҳибсга олингандан сўнг, унинг ижтимоий тармоқларида "халқ иродасини қўрқитиш ёки ноқонуний ҳаракатлар орқали бостириб бўлмайди”, деган баёнот пайдо бўлди.

"Мен нафақат Истанбулнинг 16 миллион аҳолисига, балки Туркиянинг 86 миллион фуқаросига, шунингдек, бутун дунёда демократия ва адолатни қўллаб-қувватлаётган барча инсонларга ишонч билдирган ҳолда қатъий турибман", дея таъкидланган баёнотда.