Ўзбекистонда "Google Pay" хизмати ишга тушди

Ўзбекистонда Google компаниясининг Google Pay рақамли тўлов хизмати ишга туширилди. Бу ҳақда 19 октябрь куни Самарқандда Марказий Осиё давлатлари ва АҚШ ўртасидаги «C5+1» формати доирасида ўтказилаётган тадбирда Google Cloud вакили Марцин Красуски маълум қилди.

Янги хизмат смартфон ва бошқа мос қурилмалар орқали банк картасидан фойдаланиб, харидлар учун контактсиз тўловларни амалга ошириш имконини беради.

Рақамли технологиялар вазирлиги матбуот хизмати хабарига кўра, эълон «Рақамли технологиялар» мавзусидаги панель сессиясида янграган. Унда Марказий Осиё мамлакатлари ва АҚШ давлат идоралари вакиллари, шунингдек, йирик компаниялар иштирок этмоқда.

Google Pay қандай ишлайди?

Google Pay - банк карталарини рақамли ҳамёнга боғлаш орқали харидлар ва хизматлар учун тўлов қилиш имконини берувчи тизим. У мос Android смартфонлари ва бошқа қўллаб-қувватланадиган қурилмалар орқали контактсиз тўловларни амалга оширишга хизмат қилади.

Дўконларда NFC технологиясини қўллаб-қувватлайдиган терминаллар орқали тўлов қилиш мумкин. Бунинг учун фойдаланувчи ўз банк картасини хизматга боғлаши лозим.

Хизматнинг Ўзбекистонда ишга туширилиши рақамли тўловлар бозорини ривожлантириш ва халқаро молиявий технологияларни маҳаллий инфратузилмага интеграция қилишдаги муҳим қадамлардан бири ҳисобланади.

Қонунчиликдаги ўзгаришлар хизматга йўл очди

Google Pay ва Apple Pay каби халқаро тўлов хизматларининг Ўзбекистонда ишга туширилишига тўсқинлик қилган омиллардан бири шахсий маълумотларни сақлаш ва қайта ишлашга оид талаблар эди.

2026 йил 26 март куни президент Шавкат Мирзиёев «Шахсга доир маълумотлар тўғрисида»ги қонунга ўзгартиришлар киритиш ҳақидаги қонунни имзолади. Унга кўра, барча шахсий маълумотларни фақат Ўзбекистон ҳудудидаги серверларда сақлаш талаби бекор қилинди.

Бироқ биометрик ва генетик маълумотлар, шунингдек, телекоммуникация операторлари абонентларига тегишли маълумотлар учун мамлакат ҳудудида сақлаш талаби сақланиб қолди. Бошқа шахсий маълумотларни эса белгиланган шартларга риоя қилинган ҳолда хорижда қайта ишлаш мумкин.

Аввалроқ Ўзбекистонда халқаро тўлов хизматларини жорий этиш масаласи бир неча бор муҳокама қилинган эди. 2026 йил ёзида Марказий банк, тижорат банклари, Humo ва Uzcard иштирокида Google Pay ҳамда Apple Pay хизматларини интеграция қилиш бўйича техник ишлар олиб борилаётгани ҳақида Тўлов тизимларини ривожлантириш департаменти раҳбари Жамшид Усмоновнинг Spot.uz нашрига берган интервюсида маълум қилинганди.

Муаллиф: Ҳасанбой ОЧУН