“Эзгулик” фаоли қарийб 4 йилдан сўнг оқланди

Бу ҳақда ҳуқуқ фаоли, Инсон ҳуқуқлари "Эзгулик" жамияти раиси Абдурахмон Ташанов ўзининг Facebook саҳифасида маълум қилди.

Унинг ёзишича, дастлаб Деҳқонобод туман суди томонидан Ўзбекистон жиноят кодекси 244-моддаси 1-қисми билан айбланиб, фаол 4 йилга озодликдан маҳрум этилган. Кейинчалик вилоят суди жазо муддатини қисқартирган.

Охир-оқибат, Ўзбекистон Олий суди ишни қайта кўриб чиқиб, Асқар Эшбўриевни оқлаган ва тергов органларига нисбатан хусусий ажрим чиқарган.

Иш тафсилотлари

Маълум қилинишича, дастлабки тергов жараёнида ҳуқуқни муҳофаза қилувчи органлар томонидан фаолнинг телефони олиб қўйилган ва ундан далил сифатида материаллар топилгани айтилган.

Абдурахмон Ташановнинг таъкидлашича, иш давомида турли суд босқичларида қарорлар қайта кўриб чиқилган ва якунда Олий суд томонидан оқлов ҳукми чиқарилган.

У, шунингдек, бу қарорни адолат қарор топгани сифатида баҳолаб, келгусида барча фуқаролар учун қонуний ва адолатли суд тизими таъминланиши муҳимлигини қайд этган.