Ўзбекистонда эрта никоҳ ва диний никоҳ маросими учун жарималар оширилди

Ўзбекистонда никоҳ ёшига оид қонунчиликни ва никоҳ тузиш тартибини бузганлик учун маъмурий жарималар оширилди. Тегишли ўзгартиришлар Президент Шавкат Мирзиёев 2026 йил 14 октябрда имзолаган қонунда назарда тутилган.

Вояга етмаган шахс билан никоҳ муносабатларига киришиш

Никоҳ ёшига етмаган шахс билан амалда никоҳ муносабатларига киришганлик учун жарима БҲМнинг 10 бараваридан 15 бараваригача этиб белгиланди. Аввал бу миқдор 5–10 баравар эди.

Вояга етмаганни турмушга бериш ёки уйлантириш

Ота-оналар ёки уларнинг ўрнини босувчи шахслар томонидан никоҳ ёшига етмаган шахсни турмушга бериш ёки уйлантириш учун БҲМнинг 20 бараваридан 25 бараваригача жарима солинади. Илгари жарима 7–15 бараварни ташкил этган.

Давлат рўйхатидан ўтмаган никоҳ учун диний маросим

Қонунда белгиланган тартибда давлат рўйхатидан ўтказилмаган никоҳ бўйича, жумладан, никоҳ ёшига етмаган шахс иштирокида диний маросим ўтказганлик учун жарима БҲМнинг 30 бараваридан 50 бараваригача оширилди. Аввал бу миқдор 15–30 баравар эди.

Ўзгаришлар Маъмурий жавобгарлик тўғрисидаги кодекснинг 47³-моддасига киритилди. Қонуннинг асосий мақсадларидан бири болаларнинг ҳуқуқ ва қонуний манфаатларини ҳимоя қилишни кучайтиришдир.