Ўзбекистонликларнинг ичимлик сувдан қарзи 430 миллиард сўмдан ошди

2026-йил 1-октябр ҳолатига кўра, Ўзбекистонда аҳоли ва корхоналарнинг ичимлик ҳамда оқова сув хизматлари учун қарзи 542,6 миллиард сўмни ташкил этди. Шундан 430,7 миллиард сўми аҳоли, 111,8 миллиард сўми юридик истеъмолчилар ҳиссасига тўғри келади. Бу ҳақда 30-октябр куни Тошкентда ўтказилган матбуот анжуманида “Ўзсувтаъминот” масъуллари маълум қилди.

Қарздорлик энг юқори бўлган ҳудуд — Тошкент шаҳри. Бу ерда истеъмолчиларнинг сув таъминоти корхоналари олдидаги қарзи 92,9 миллиард сўмга етган. Андижон вилоятида бу кўрсаткич 74,1 миллиард, Тошкент вилоятида 61,6 миллиард, Фарғона вилоятида эса 57 миллиард сўмни ташкил этади.

Қарздорликни ундириш бўйича 2026-йилнинг ўтган даврида нотариуслар ва судларга 167 783 та ариза киритилган. Натижада 114 305 та ижро хати ва суд буйруғи чиқарилиб, 110 563 та ҳужжат Мажбурий ижро бюросига юборилган.

Амалдаги тартибга кўра, истеъмолчилар сув хизматлари учун тўловни ҳар ойнинг 10-санасига қадар тўлиқ амалга ошириши керак. Қарздорлик юзага келганида аввал истеъмолчига ёзма огоҳлантириш юборилади. Қарз бартараф этилмаса, хизматни чеклаш ва уни ундириш чоралари кўрилади.

Сув тарифлари олти корхонада оширилди

Айни пайтда Ўзбекистонда ичимлик ва оқова сув хизматлари тарифлари қайта кўриб чиқилмоқда. 27-октябр ҳолатига кўра, олтита сув таъминоти корхонасида янги нархлар тасдиқланган.

Энг катта ўсиш Андижон вилоятида кузатилган: ичимлик сувининг бир куб метри учун тариф 1 650 сўмдан 2 500 сўмга оширилган. Сурхондарё вилоятида нарх 5 300 сўмдан 6 800 сўмга, Самарқандда 2 800 сўмдан 3 600 сўмга кўтарилган.

Шунингдек, Навоий вилоятида тариф 3 500 сўмдан 4 200 сўмга, Тошкент вилоятида 2 600 сўмдан 3 100 сўмга оширилган. “Чимён-Чорвоқ” магистрал сув таъминоти корхонасида эса нарх 1 500 сўмдан 1 700 сўмга ўзгарган.

2027-йилдан тарифларни ким тасдиқлайди?

2027-йил 1-январдан ичимлик ва оқова сув хизматлари тарифларини тасдиқлаш ваколати ҳудудий кенгашлардан Вазирлар Маҳкамаси ҳузуридаги Идоралараро тариф комиссиясига ўтказилади. Янги тартибга кўра, нархлар ягона иқтисодий асосланган мезонлар бўйича кўриб чиқилади.

Бундан ташқари, 2027-йил 1-апрелдан буджет ташкилотлари учун ичимлик ва оқова сув хизматларига республика бўйича ягона тариф жорий этилиши белгиланган.