Ўзбекистонда хантавирус мавжудми?

Хантавирус пандемия хавфини туғдирмайди

Жаҳон соғлиқни сақлаш ташкилоти маълумотларига кўра, хантавирус коронавирус каби тез тарқалувчи инфекция ҳисобланмайди ва глобал пандемияга айланиш эҳтимоли паст.

Мутахассиснинг таъкидлашича, дунёда хантавируснинг 20 дан ортиқ тури мавжуд бўлиб, уларнинг фақат айримлари инсон организмида касаллик чақириши мумкин.

Вирус асосан кемирувчилар орқали юқади

Хантавирус асосан кемирувчилар орасида учрайди. Инсонга эса ҳайвонларнинг сийдиги, ахлати ёки сўлаги билан ифлосланган маҳсулотлар ва чанг орқали юқиши мумкин.

Айрим ҳолатларда узоқ вақт зарарланган муҳитда бўлиш ёки кемирувчилар билан мунтазам алоқа юқиш хавфини оширади.

Касаллик белгилари қандай?

Хантавирус қуйидаги аломатлар билан кечиши мумкин:

• тана ҳарорати кўтарилиши;
• бош оғриғи;
• ҳолсизлик;
• кўнгил айниши ва қусиш;
• мушак ва қорин соҳасида оғриқ.

Оғир ҳолатларда буйрак етишмовчилиги, нафас олиш ва юрак-қон томир тизими билан боғлиқ асоратлар кузатилиши мумкин.

Вакцина ҳозирча мавжуд эмас

Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков маълум қилишича, ҳозирча хантавирусга қарши махсус вакцина ишлаб чиқилмаган. Шунингдек, касаллик учун алоҳида даволаш протоколи ҳам йўқ.

Даволаш жараёни бемордаги симптомларга қараб олиб борилади.

Фуқароларга қандай тавсиялар берилди?

Санитария-эпидемиологик осойишталик ва жамоат саломатлиги қўмитаси аҳолига қуйидаги профилактик чораларга амал қилишни тавсия қилди:

• шахсий гигиена қоидаларига риоя қилиш;
• уй ва иш жойларини тоза сақлаш;
• озиқ-овқат маҳсулотларини хавфсиз сақлаш;
• мева ва сабзавотларни яхшилаб ювиш;
• омборхона ва ёпиқ хоналарни мунтазам шамоллатиш.

Шунингдек, эндемик ҳудудлардан қайтган фуқароларга оилавий поликлиникага мурожаат қилиш тавсия этилган.

Чегараларда назорат кучайтирилган

Маълум қилинишича, хавфли инфекциялар кириб келишининг олдини олиш мақсадида Ўзбекистондаги 53 та чегара пунктида доимий санитария назорати олиб борилмоқда.