Ўзбекистонга 44 даражагача жазирама иссиқ яқинлашмоқда

Шанба куни Тошкент вилояти ҳамда Фарғона водийсининг айрим ҳудудларида қисқа муддатли ёғингарчилик кузатилиши эҳтимол қилинмоқда.

Якшанба куни эса шимоли-ғарбда об-ҳаво беқарор бўлади. Қорақалпоғистон Республикаси ва Хоразм вилоятининг айрим жойларида кучли ёмғир ёғиши кутилмоқда. Республиканинг қолган қисмида эса ёғингарчилик прогноз қилинмаган.

Шамол шарқий йўналишдан секундига 7–12 метр тезликда эсади. Айрим ҳудудларда шамол тезлиги 15–20 метргача кучайиши, чанг-тўзонлар кузатилиши мумкин.

Кундузи республика бўйлаб ҳаво ҳарорати 35–40 даража, айрим жойларда 42 даражагача, жанубий ҳудудларда эса 43–44 даражагача кўтарилади.

Қорақалпоғистон Республикаси ва Хоразм вилоятида ҳаво нисбатан салқин бўлиб, ҳарорат 32–37 даража атрофида бўлади. Якшанба куни Қорақалпоғистоннинг шимолида ҳарорат 23–28 даражагача пасайиши мумкин.

Тошкентда қандай об-ҳаво бўлади?

Пойтахтда якшанба куни ёғингарчилик кутилмайди. Ҳаво 39–41 даражагача исийди, кечаси эса 23–26 даража илиқ бўлади. Айрим ҳудудларда чанг-тўзон кузатилиши мумкин.

Аввалроқ Ўзгидромет 28 июндан 3 июлгача кутилaётган кучли ёғингарчилик сабабли Ўзбекистоннинг тўққиз вилоятида сел келиши, сув тошқини ва маҳаллий тошқинлар юзага келиши мумкинлиги ҳақида шошилинч огоҳлантирган эди.