Ўзбекистонда ҳаво кескин совийди: ёмғир ва қор кутилмоқда

Ўзбекистонда октябрь ойи беқарор об-ҳаво билан бошланади. Ўзгидромет маълумотларига кўра, 4 октябрдан республиканинг шимоли-ғарбий ҳудудларига совуқ ва нам ҳавонинг янги оқими кириб келади. 5–7 октябрь кунлари бу ҳаво массалари республика ҳудудининг қолган қисмига ҳам тарқалади.

2–4 октябрь кунлари мамлакатнинг катта қисмида ёғингарчилик кутилмайди. Шу даврда ҳаво ҳарорати вақтинча кўтарилади. Бироқ 5 октябрдан ҳарорат яна пасая бошлайди.

Қорақалпоғистон ва Хоразмда 3–4 октябрь кунлари айрим жойларда ёмғир ёғиши мумкин. 5 октябрга келиб бу ҳудудларда кундузги ҳарорат 12–17 даражагача пасаяди.

Бухоро ва Навоий вилоятларида 5 октябрда айрим жойларда ёмғир ёғиши, Тошкент, Самарқанд, Жиззах ва Сирдарё вилоятларида ҳам шу куни ёғингарчилик кузатилиши мумкин. Қашқадарё ва Сурхондарёда эса 5 октябрда айрим жойларда ёмғир кутилмоқда.

Тоғолди ва тоғли ҳудудларда ёғингарчилик кучайиши, момақалдироқ кузатилиши мумкин. Баланд тоғларда ёмғир қорга айланиши эҳтимоли бор. Айрим жойларда шамол тезлиги 15–20 метр/секундгача кучайиши мумкин.

Шунингдек, Ўзгидромет октябрь ойи давомида ҳароратнинг бир неча бор ўзгариб туриши кутилaётганини маълум қилди.