Тошкентда ёмғир ёғиши кутилмоқда

Тошкентда қандай об-ҳаво кузатилади?

12 октябрь, душанба куни Тошкент шаҳрида вақти-вақти билан ёмғир ёғиши кутилмоқда. Кундузи ҳаво ҳарорати 19–21 даража илиқ бўлади. Ғарбдан секундига 3–8 метр тезликда шамол эсади.
Бу ҳақда Ўзбекистон гидрометеорология хизмати хабар бермоқда.

Бошқа ҳудудларда об-ҳаво қандай бўлади?

Бухоро, Навоий, Тошкент, Самарқанд, Жиззах ва Сирдарё вилоятларининг айрим жойларида ёмғир ёғиши кутилмоқда. Кундузги ҳарорат 18–23 даража атрофида бўлади.

Андижон, Наманган ва Фарғона вилоятларида ҳам шунга ўхшаш об-ҳаво кузатилиши прогноз қилинган.

Қашқадарё ва Сурхондарё вилоятларида айрим жойларда ёмғир ёғиши мумкин. Жанубий ҳудудларда ҳаво нисбатан илиқ бўлиб, ҳарорат 23–28 даражагача кўтарилади.

Қорақалпоғистон Республикаси ва Хоразм вилоятида эса ёғингарчилик кутилмаяпти. Бу ҳудудларда кундузи ҳаво ҳарорати 21–26 даража бўлиши прогноз қилинган.

Вилоятлар бўйлаб шамол секундига 7–12 метр тезликда эсиши мумкин.

Тоғли ҳудудларда сел хавфи бор

Тоғли ҳудудларда ёмғир айрим жойларда кучли ёғиши мумкин. Баланд тоғларда ёмғир қорга айланиши эҳтимоли бор. Ушбу ҳудудларда кундузги ҳаво ҳарорати 7–12 даража атрофида бўлиши кутилмоқда.

Прогнозда тоғолди ва тоғли ҳудудларда сел ҳамда сув тошқини юзага келиш эҳтимоли ҳам қайд этилган.

Фуқароларга об-ҳаво прогнозларини кузатиб бориш ва тоғли ҳудудларга сафар режалаштиришда эҳтиёткор бўлиш тавсия этилади.

Муаллиф: Ҳасанбой ОЧУН