Ўзбекистонда 13 ноябргача об-ҳаво қандай бўлади?

«Ўзгидромет» 9–13 ноябрь кунлари Ўзбекистон ҳудудида кузатиладиган об-ҳаво ҳақида маълумот берди.

Идора маълумотига кўра, дам олиш кунлари мамлакатда ноябрь ойи учун хос бўлмаган илиқ об-ҳаво кузатилди. Ҳаво ҳарорати кўп йиллик меъёрдан 10–12 даража юқори бўлиб, кундузи республика бўйича 25–28 даража, жанубий ва чўл ҳудудларида эса 30–32 даражагача кўтарилди.

Бироқ 9 ноябрь кунидан об-ҳаво ўзгара бошлади. Республикага совуқ ва нам ҳаво массалари кириб келиши муносабати билан айрим ҳудудларда ёмғир, баъзи жойларда кучли ёғингарчилик ва момақалдироқ кутилмоқда. Фарғона водийсида эса бугун ёғингарчилик прогноз қилинмаган.

Шунингдек, айрим ҳудудларда шамол тезлиги секундига 13–18 метргача кучайиши, чанг-тўзон кузатилиши мумкин. Кундузги ҳарорат 15–20 даража, шимолда 8–13 даража бўлиши кутилмоқда.

10 ноябрь куни республика бўйлаб ёмғир ёғиши, айрим жойларда ёғингарчилик кучли бўлиши мумкин. Қорақалпоғистон Республикасида ёмғир қорга айланиши эҳтимоли бор. Ҳарорат кундузи 10–15 даража, шимолда 5–10 даража атрофида бўлади.

11 ноябрь куни мамлакатнинг катта қисмида ёмғир кутилмоқда. Қорақалпоғистон, Хоразм, Бухоро ва Навоий вилоятларида ёғингарчилик бўлмаслиги прогноз қилинган. Ҳарорат кундузи 7–12 даража, шимолда 3–8 даража бўлади.

12 ноябрь куни республика бўйича ёғингарчилик кутилмайди. Ҳаво ҳарорати кечаси 0–5 даража илиқ, айрим жойларда 2 даражагача совуқ, кундузи эса 7–12 даража илиқ бўлади.

13 ноябрь куни мамлакатнинг айрим ҳудудларида ёмғир ёғиши мумкин. Қорақалпоғистон, Хоразм, Бухоро ва Навоий вилоятларида ёғингарчилик кутилмайди.

Тошкентда об-ҳаво

Пойтахтда 9 ноябрь куни вақти-вақти билан ёмғир ёғади, момақалдироқ бўлиши мумкин. Ҳарорат 18–20 даража илиқ бўлади.

10 ноябрь куни ёмғир давом этиши, ҳаво ҳарорати кечаси ва кундузи 12–14 даража атрофида бўлиши кутилмоқда.

11 ноябрь куни вақти-вақти билан ёмғир ёғади. Ҳарорат кечаси 5–7 даража, кундузи 8–10 даража бўлади.

12 ноябрь куни ёғингарчилик кутилмайди. Ҳарорат кечаси 1–3 даража, кундузи 10–12 даража илиқ бўлиши прогноз қилинган.

Муаллиф: Ҳасанбой ОЧУН