Тошкентда ОИТС тарқатиш мақсадида ўриндиқларга игна қўйиб кетишётгани ростми?

Пойтахт ИИББ томонидан ўтказилган тезкор суриштирувлар натижасида ушбу сохта видеони тайёрлаган ва тарқатган шахслар аниқланган. Улар ОИТС билан боғлиқ бўлган хавотир ва ваҳима уйғотиш мақсадида инсайдерлик кўринишидаги саҳналаштирилган видеоларни тайёрлаганликларини тан олган.

«Ўртоғим “СПИД ҳақида видео олайлик” деганди. Қилган ишимдан пушаймонман. Бутун халқдан узр сўрайман. Бу даражада оммага чиқиб кетишини билмаганман», — деди видеони тайёрлаган шахслардан бири.

Яна бир шахс эса видеони Instagram’da кўрганидан сўнг уни “лайк” ва “кўришлар” учун қайта ишлаб тарқатганини маълум қилди:
«Ўриндиққа шприц қўйиб кетилгани ҳақидаги видеони шунчаки кўришлар учун қилгандим. Қилган ишимдан афсусдаман, халқдан узр сўрайман», — деди у.

Видеони тайёрлаб тарқатган икки шахсга нисбатан Маъмурий жавобгарлик тўғрисидаги кодекснинг 202-2-моддаси («Ёлғон ахборот тарқатиш») бўйича ҳуқуқий ҳужжатлар расмийлаштирилди.

Ҳолат юзасидан иш Жиноят ишлари бўйича Мирзо Улуғбек туман судига юборилди.