Ўзбекистонда тергов ҳибсхоналарига жойлаштирилаётган шахслар учун мажбурий тиббий кўрик жорий қилинди

Тегишли ўзгартиришлар "Жиноят ишини юритиш чоғида қамоқда сақлаш тўғрисидаги"ги қонунга киритилган. Ушбу қонун 21 январь куни Қонунчилик палатаси томонидан қабул қилиниб, 18 мартда Сенат томонидан маъқулланган ва 26 июнь куни Президент томонидан имзоланган. Қонун 27 сентябрдан кучга киради.

Янги 27(1)-моддага кўра, шахс тергов ҳибсхонасига қабул қилинганидан кейин икки соат ичида тиббий кўрикдан ўтказилиши шарт. Кўрик ҳибсга олинган шахс билан бир хил жинсдаги тиббиёт ходими томонидан амалга оширилади. Агар шахс рози бўлса, кўрикда унинг адвокати ҳам иштирок этиши мумкин.

Тиббий кўрик натижаларига асосан белгиланган шаклдаги тиббий хулоса расмийлаштирилади. Агар тан жароҳати, яра ёки бошқа шикастлар аниқланса, улар албатта ҳужжатлаштирилади, бу ҳақдаги маълумот ҳибсга олинган шахсга етказилади ва зудлик билан прокурорга тақдим этилади.

Шунингдек, бу каби тиббий кўрик шахс бошқа жойга олиб борилгач ёки тергов ҳаракатларидан сўнг тергов ҳибсхонасига қайтарилганида ҳам амалга оширилади.