Тошкент вилоятидаги ёпиқ муассасаларда мониторинг ўтказилди

Хусусан, Нурафшон шаҳри, Тошкент тумани ва Чирчиқ шаҳри ИИБнинг вақтинча сақлаш ҳибсхоналари (ВСҲ), Тошкент, Чирчиқ ва Бўка туманларидаги мастлик ҳолатида бўлган шахсларга тиббий ёрдам кўрсатиш пунктлари (ҳушёрхоналар), Бўстонлиқ туманидаги 7-сонли жазони ижро этиш колонияси, Чирчиқ шаҳридаги 13-сонли жазони ижро этиш муассасаси, шунингдек, Олмалиқ, Оҳангарон шаҳарлари ҳамда Сергели, Янги Ҳаёт, Оҳангарон, Юқори Чирчиқ, Зангиота ва Бўка туманларидаги бир қатор манзил-колониялар кўздан кечирилди.

Бундан ташқари, Зангиота туманидаги 24-сонли тарбия колонияси, Нурафшон шаҳридаги муайян яшаш жойига эга бўлмаган шахсларни реабилитация қилиш маркази ҳамда маъмурий қамоққа олинган шахслар сақланадиган махсус қабулхона ҳам мониторингдан ўтказилди.

Ташрифлар давомида муассасалардаги ётоқхоналар, ювиниш хоналари, ошхона, тиббиёт бўлимлари, озиқ-овқат ва дори-дармон сақлаш жойлари, кутубхона, маданий дам олиш хоналари, телефон орқали мулоқот ва учрашув хоналари, тергов ва адвокатлар хоналари, шунингдек видеокузатув камералари ҳолати ўрганилди.

Мониторинг жараёнида айрим камчиликлар ҳам аниқланган. Жумладан, 43 ва 46-сонли манзил-колонияларнинг интизомий бўлинмалари, Нурафшон шаҳар ва Тошкент тумани ВСҲ ҳамда Бўка тумани тиббиёт бирлашмаси таркибидаги ҳушёрхона таъмирталаб ҳолатда экани маълум бўлган.

Шунингдек, 46-сонли манзил-колонияси интизомий бўлинмасида, Бўка ва Чирчиқ тиббиёт бирлашмалари таркибидаги ҳушёрхоналарда иссиқлик тизими билан боғлиқ муаммолар кузатилган.

Нурафшон шаҳридаги муайян яшаш жойига эга бўлмаган шахсларни реабилитация қилиш марказида эса хоналар ҳарорати етарли эмаслиги, вентиляция ҳамда санитария-гигиена талабларига риоя этилмагани қайд этилган.

Бўка туманидаги ҳушёрхонада тиббиёт хонасидаги матраслар яроқсиз ҳолга келгани, шахслар жойлаштириладиган хоналарда эса эшиклар мавжуд эмаслиги, фақат темир панжаралар ўрнатилгани аниқланган.

Мониторинг натижаларига кўра, аниқланган камчиликларни бартараф этиш юзасидан тегишли вазирлик ва идораларга Омбудсман томонидан таъсир чоралари қўллаш бўйича ҳужжатлар киритилди.