Йиртқичлар асрида кучли бўлишимиз керак - Макрон

Янги кема 2038 йилда фойдаланишга топширилиши режалаштирилган.

Президент Макрон Франция ҳарбий хизматчилари олдида Абу-Дабида сўзлаган нутқида Porte-Avions Nouvelle Génération (PA-NG) лойиҳаси бўйича қарор шу ҳафта қабул қилинганини маълум қилди.

«Йиртқичлар асрида биз кучли бўлишимиз керак — айниқса денгизда», — деди Макрон.

Янги авианосец ҳақида нималар маълум?

PA-NG лойиҳаси доирасида қуриладиган авианосец:

• 78 минг тонна сув сиғимига,
• 310 метр узунликка эга бўлади,
• 30 тагача реактив самолётни олиб юриш имкониятига эга.

Таққослаш учун, ҳозирги «Шарль де Голль» авианосецининг сув сиғими 42 минг тонна, узунлиги эса 261 метрни ташкил этади. Янги кема дунёдаги энг йирик авианосец — АҚШнинг USS Gerald R. Ford кемасидан кичик бўлса-да, Европадаги энг йирик ҳарбий кема бўлади.

Янги авианосец ҳам ядровий двигател билан жиҳозланади ва Rafale M жанговар самолётларини қабул қилади. Кемада икки ёки учта электромагнит катапульта (EMALS) ўрнатилади.

Иқтисод ва саноат учун аҳамияти

Макрон таъкидлашича, лойиҳага 800 та корхона жалб этилади, уларнинг 80 фоизи кичик ва ўрта бизнес субъектлари ҳисобланади.

«Мен бу мажбуриятни шахсан кафолатлайман ва келаси йил февралда верфга ташриф буюраман», — деди президент.

Франция мудофаа вазири Катрин Вотреннинг айтишича, янги авианосец оғир қуролли ва узоқ масофали операцияларда узоқ муддат давомида қатнашиш имкониятига эга бўлади.

Лойиҳа қиймати ва баҳслар

PA-NG дастурининг умумий қиймати тахминан 10,25 миллиард евро деб баҳоланмоқда. Ядровий энергетик қурилма қисмлари устида ишлар ўтган йили бошланган, асосий буюртма эса 2025 йил бюджети доирасида жойлаштирилиши кутилмоқда.

Шу билан бирга, айрим марказчи ва мўътадил сўл сиёсатчилар давлат молиясидаги қийин вазият сабабли лойиҳани кечиктиришни таклиф қилган.

Мудофаа харажатлари оширилади

Макрон яқин икки йилда мудофаа соҳасига қўшимча 6,5 миллиард евро ажратилишини маълум қилди. 2027 йилга келиб Франциянинг мудофаа бюджети 64 миллиард еврога етказилиши режалаштирилган — бу 2017 йилдаги кўрсаткичдан икки баробар кўп.

Ҳозирда Франция Қуролли кучларида 200 минг ҳарбий хизматчи ва 40 мингдан ортиқ резервист бор. 2030 йилга келиб резервистлар сонини 80 минг нафарга етказиш мақсад қилинган.

Франция Европа Иттифоқида ядровий давлат ҳисобланади ва атом авианосецга эга бўлган ягона Европа мамлакатидир. Янги PA-NG кемаси Европа ҳарбий-денгиз салоҳиятини сезиларли даражада ошириши кутилмоқда.