200 kVt limit: Jamoatchilik munosabati va tarmoqlardagi chiqishlar

Avvallari oddiy aholi 201 kVt/soat elektr ishlatib 59 295 so‘m to‘lagan bo‘lsa, 1-maydan boshlab 180 900 so‘m to‘lab kelmoqda. Bu borada may oyining boshida ham fuqarolarning fikrini o‘rgangan edik. O‘shanda ba’zilar narx oshganligidan bexabarligini aytsa, yana ba’zilar butun dunyoda oshayotganligi sabab bunga tabiiy jarayon sifatida qaragandi.

Hozirga kelib esa masala jamoatchilik orasida qizg‘in muhokama qilinmoqda, xususan Facebook va Instagram’da limitni bekor qilishni so‘rab hatto chellenjlar boshlanib ketgan. Turli jamoatchilik faollari ham masalaga munosabat bildirishmoqda.

Jurnalist-bloger Fotima Jo‘rayevaning 1 kilogramm ko‘mirdan 8 kilovatt elektr ishlab chiqarilishi va u davlatga 53 so‘mga tushishi haqidagi gaplari jamoatchilik orasida turli izohlarga sabab bo‘lmoqda. Shuningdek, bloger Qirg‘iziston va Qozog‘istondagi elektr narxlari haqida ham gapirdi. Yana ko‘plab fuqarolar o‘z noroziligini ijtimoiy tarmoqlar orqali bildirmoqda.

Paradigma.uz jamoasi ham masala yuzasidan navbatdagi ijtimoiy so‘rovni o‘tkazdi.

2 hafta oldin Hududiy elektr tarmoqlari vakili matbuotga tarmoqlarda tarqalayotgan e’tirozlar o‘rinsiz ekanligini bildirgan edi.

Shunga qaramay masala yuzasidan fuqaro Mardon Subhonov tomonidan Vazirlar mahkamasining limitlarni joriy etish haqidagi 2024-yil 16-aprelda qabul qilingan  “Yoqilg‘i-energetika sohasida bozor mexanizmlarini joriy etishning qo‘shimcha chora-tadbirlari to‘g‘risida”gi 204-sonli qarori ustidan sudga ariza kiritilgandi, ammo arizani ko‘rib chiqish sud tomonidan rad etildi.

O‘tgan yilning dekabr oyida Energetika vaziri Jo‘rabek Maxmudov joriy 2024-yilda ichki ehtiyoj 100 foiz qoplanishi haqida gapirgan edi.